Atyraýlyqtar álem chempıonyn kútip aldy

ATYRAÝ. QazAqparat - Atyraý áýejaıynda kezekti ret áýelegen án oınalyp, halyqtyń yqylasyna bólengen saltanatty kútip alý rásimi ótti, dep habarlaıdy QazAqparat tilshisi.

25-27 qazan kúnderi Chılı eliniń Santıago qalasynda karateden jastar arasyndaǵy XI Álem chempıonatynda Ábilmansur Batyrǵalı altynnan alqa taqty.

«Bul Atyraý sportyndaǵy tarıhı oqıǵa. Atyraýlyq sportshylardyń Olımpıadalyq sport túrleri boıynsha jastar arasyndaǵy álem chempıonatynda enshilegen alǵashqy altyn medali. 96 memleketten 1500-den astam sportshy qatysqan dodada sportshymyz úzdik atanyp, el abyroıyn asqaqtatty», - deıdi oblystyq Dene shynyqtyrý jáne sport basqarmasynyń bólim basshysy Nurjaýǵan Tóleýova.

Atyraýlyq sportshy, jasóspirimder Olımpıadasy oıyndarynyń júldegeri, Azııa chempıony Ábilmansur Batyrǵalı 67 keli salmaqta synǵa túsip, barlyq alty qarsylasynan basym tústi. Bul salmaqta 60 el ókilderi ózara myqtyny anyqtady. Áýejaıdan shyqqan boıda Ábilmansurdyń oqý orny, H.Dosmuhamedov atyndaǵy ýnıversıtette baspasóz maslıhaty ótti. Onda Ábilmansur jarystan alǵan áserimen bólisti. «Bul úlken jeńisterdiń bastamasy ǵana. Aldaǵy ýaqytta eresekter arasynda álem jáne Olımpıada shyńyn baǵyndyrý úshin eńbektenetin bolamyn. Erinbeı, únemi daıyndyqta bolǵan sportshy úshin alynbas qamal joq», - deıdi Ábilmansur.