Atyraýlyqtar 40-qa jýyq qarý men 100-den astam oq-dári tapsyrdy
ATYRAÝ. QazAqparat – Atyraý oblysynyń turǵyndary 40-qa jýyq qarý men 100-den astam oq-dári tapsyrdy, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
Shildeden beri óńir turǵyndary óz erkimen jergilikti polıtsııa bólimderine 40-qa jýyq atys qarýynyń túrlerin, 100-den astam oq-dári tapsyrǵan. Erikti túrde qarý men oq-dári tapsyrǵandarǵa syıaqy retinde respýblıkalyq qazynadan 1 mln 700 myń teńge tólenetini kózdelip otyr.
«Aktsııanyń maqsaty – qoǵamdyq qaýipsizdikti qamtamasyz etý, atys qarýlarymen jasalatyn qylmystar men quqyqbuzýshylyqtardyń aldyn alý. Aktsııa kezinde erikti túrde zańsyz saqtalǵan qarý-jaraq pen oq-dárilerdi tapsyrǵandar qylmystyq, ákimshilik jaýapkershilikten bosatylady. Azamattarǵa syıaqy QR Іshki ister mınıstriniń «Zańsyz saqtalǵan atys qarýyn, oq-dárini jáne jarylǵysh zattardy azamattardyń erikti túrde ótemdi tapsyrý qaǵıdalaryna bekitý týraly» buıryǵynyń talaptaryna sáıkes tólenedi»,- dep habarlady departamenttiń baspasóz qyzmeti.
Eske sala ketelik, budan buryn Atyraýda qarý tasymaldaǵan júrgizýshi ustalǵan bolatyn.
