Atyraýlyq júrgizýshi shanadaǵy boıjetkendi kóligine tirkep súıregen
ATYRAÝ. QazAqparat – Atyraýda shanadaǵy boıjetkendi kóligine tirkep súıregen júrgizýshi jaýapkershilikke tartyldy, dep habarlaıdy QazAqparat.
Atyraý qalalyq polıtsııa basqarmasy Jedel basqarý ortalyǵynyń qyzmetkerleri búgin saǵat 01:07 shamasynda ortalyq kópir tusynda shana súıregen kólikti baıqaǵan. Oqıǵa ornyna patrýldik polıtsııa qyzmetkerleri jiberildi.
«Patrýldik polıtsııa tekserýi kezinde 22 jastaǵy azamatsha otyrǵan shanany tirkep, súırep júrgen «Hyundai Tucson» markaly kólikti toqtatqan. Kólikti basqarǵan 20 jastaǵy júrgizýshige qatysty QR Ákimshilik quqyqbuzýshylyq kodeksiniń 595-baby 1-bólimimen (jol júrisi qaǵıdasyn buzǵany) ákimshilik hattama toltyrlyp, 13 890 teńge kóleminde aıyppul salyndy», - dep habarlady oblystyq polıtsııa departamentiniń baspasóz qyzmetinen.
Eske sala ketelik, budan buryn Atyraýda mas kúıde kólik júrgizgen sheteldik 15 táýlikke qamalǵan edi.
