Atyraýlyq júrgizýshi aıazda adamdardy tegin tasýda
ASTANA. QazAqparat - Astynda kóligi bar atyraýlyq azamat adamdardy aıazǵa baılanysty tegin tasyp júr. Ol óziniń qaıyrymdylyq aktsııasyna «Atyraý - meıirim qalasy» degen at qoıypty, dep jazady «Moı GOROD».
Kólik ıesi qaladaǵy taksı júrgizýshilerin jáne barlyq meıirimdi adamdardy atalmysh aktsııaǵa qatysýǵa shaqyryp júr.
«Atyraýda avtobýs jetispeıdi. Jergilikti bılik bul máseleni sheship jatqan kezde aıaldamalarda analarymyz ben qaryndastarymyz, oqýshylar aıazǵa tońyp tur. Shamamyz jetkenshe olardy úılerine jetkizip tastaıyq»,-dep jazady @million_kz001 atty qoldanýshy óziniń Instagram paraqshasyna.
Ol sonymen qatar adamdardyń mundaı qaıyrymdylyqqa tańdanyspen qaraıtynyn da jetkizdi.
«Tegin tasımyz degendi estigen adamdar, túsinbeı qalyp qaıtadan surap jatady»,-dep jazady ol.
