Atyraýlyq «Jasyl El» jasaǵy arheologııalyq qazba jumystaryna qatysady
ATYRAÝ. QazAqparat - Atyraý oblysy - «Jasyl El» eńbek jasaǵyn arheologııalyq qazba jumystaryna jumyldyrǵan elimizdegi birinshi óńir. Bul týraly «QazAqparat» HAA tilshisi Atyraý oblysynyń óńirlik kommýnıkatsııalar qyzmetine silteme jasap habarlaıdy.
Atyraý oblysynda «Jasyl El» baǵdarlamasy boıynsha 16-29 jas aralyǵyndaǵy eńbek jasaǵynyń 5 túri ashyldy. Olar - «Jasyl El» kógaldandyrý jasaǵy, qurylys jasaqtary, «Jas Agro» aýyl sharýashylyǵy jasaǵy, pedagogıkalyq jáne arheologııalyq jasaqtar.
«Jasyl El» júıesindegi arheologııalyq jasaqtar qazir tek Atyraý oblysynda bar. Óńir basshysy jasaqtaǵy stýdentterdiń sanyn 600-den 2000 adamǵa deıin kóbeıtý týraly tapsyrma berdi. Osylaısha, jergilikti bıýdjettiń esebinen qarjylandyrý birneshe esege ósti. Qazir baǵdarlamaǵa 140 mln teńge bólindi - onyń 39-y respýblıkalyq bıýdjettiń transferti, qalǵany jergilikti bıýdjettiki. Bul stýdentter jasaǵynyń qyzmetin keńeıtip, qurylys, aýyl sharýashylyǵy, bilim berý jáne arheologııa salalaryn damytýǵa jol ashýda», - dedi Jastar saıasaty basqarmasynyń basshysy Jasulan Bısimbıev.
Maýsym aıynda 14 jas azamattan quralǵan 1-shi jasaq Qyzylqoǵa aýdanynda - Qarabaý kentinde óz jumysyn bastady. Olar eski qorǵandardy qazý jumystarymen aınalysýda. Shilde men tamyz aılarynda Saraıshyq qalasynyń aýmaǵynda jáne Maqat aýdanyndaǵy «Tas keshý - Kerýen saraı» tarıhı eskertkishiniń aýmaǵynda qazba jumystaryn júrgizý josparlanýda.
