Atyraýlyq jastar «National Geographic Qazaqstan» jýrnalyn tegin alyp oqıdy

ASTANA. QazAqparat «Kaspıı qubyr konsortsıýymy-Q» AQ bıyl Atyraý oblysyndaǵy barlyq bilim ordalaryn álemge tanymal «National Geographic Qazaqstan» jýrnalyna tegin jazdyrdy. Bul jaıynda Kaspıı qubyr konsortsıýymyń basshylyǵy Atyraý Munaı jáne gaz ýnıversıtetinde ótken kezdesý barysynda jarııa etti, dep habarlaıdy QazAqparat.

Konsortsıým baspasóz qyzmetiniń málimetinshe, Atyraý óńirine jýrnaldyń 20 myń danasy Qazposhta bólimsheleri arqyly turaqty jetkizilip turady. Bul jobanyń maqsaty - álemdik deńgeıdegi tanymal zertteýleri men sapaly fotosýretteri bar ǵylymı-tanymdyq jýrnaldy mektep oqýshylary men kolledj, joǵary oqý oryndarynyń stýdentterine qoljetimdi etý.

Atyraý Munaı jáne gaz ýnıversıtetiniń rektory Álı Ábishevtiń aıtýynsha, bilim ordasynyń stýdentteri aı saıyn bul basylymnyń 50 danasyn alyp, qyzyǵa oqıdy.

«Qaspıı qubyr konsortsıýmymen seriktestik baılanysymyz biraz jyl boıy jalǵasyp keledi. 2016 jyly kompanııanyń demeýshiligi arqasynda sport alańy salynyp, tennıs korty, basketbol men voleıbol oınaıtyn alańdar qoldanysqa berildi. Alǵysymyzdy bildire, ol alańdy «KQK -Arenasy» dep atadyq», - dedi ol.

«Jalpy, Kaspıı qubyr konsortsıýmy qurylǵan kezinen bastap, áleýmettik salaǵa, onyń ishinde bilim berý, ekologııa máselelerine erekshe mán berip keledi. 2000 jyldan bastap biz 7,9 mlrd teńge qarjyny Atyraý oblysynyń áleýmettik salasyna jumsadyq jáne budan bylaı da  bilim salasyna baǵyttalǵan qaıyrymdylyq jobalarymyzdy jalǵastyramyz», - dedi «Kaspıı qubyr konsortsıýymy-Q» AQ bas dırektorynyń QR Úkimetimen baılanys jónindegi orynbasary Qaıyrgeldi Qabyldın.

Shara barysynda Munaı jáne gaz ýnıversıteti Keńesiniń sheshimimen Qaıyrgeldi Qabyldınge ýnıversıtettiń qurmetti professory ataǵy berildi.