Atyraýlyq jasóspirim shahmatshy Zarına Nurǵalıeva álem chempıony atandy
Oblystyq dene shynyqtyrý jáne sport basqarmasynyń baspasóz qyzmetinen málim etkendeı, Rýmynııa elinde shahmattan álem chempıonaty ótti.
«Álemdik dodada jahannyń 72 elinen 96 shahmatshy baǵy men babyn sarapqa saldy. Qazaqstannan bul chempıonatqa jas ereksheligine baılanysty birneshe shahmatshy qatysty. Onyń ishinde Atyraý oblysynan Zarına Nurǵalıeva da bar. Ol klassıka sanatynda 14 jasqa deıingi qyzdar arasynda qarsylastarynyń bárinen basym tústi. Bastapqyda AQSh, Kanada jáne Reseı Federatsııasynyń shahmatshylarymen teń oınady. Keıin Úndistan, AQSh, Polsha, Ýkraına, Ázerbaıjan, Lıtva men Reseı Federatsııasynan qatysqan qarsylastarynyń osal tusyn taýyp, jeńiske jetti. Osylaısha, atyraýlyq jasóspirim shahmatshy 11 kezeńde 9 jınady. Bul jeńisi onyń álem chempıony atanýyna dańǵyl jol ashty», - dep habarlady basqarmanyń baspasóz qyzmeti.
Jasóspirim shahmatshy Zarına Nurǵalıevanyń jasy 13-te. Ony Atyraý oblysynyń shahmattan aǵa jattyqtyrýshysy Sabyrbaı Ǵaısın men FIDE jáne halyqaralyq sport sheberi, Azııa chempıony Jánibek Amanov aqyldylar oıynynyń qyr-syryn meńgerýge baýlyp júr.
«Zarına Nurǵalıeva 2019 jyly Belarýs Respýblıkasynda ótken álem chempıonatynda 12 jasqa deıingi jasóspirimder arasynda álem chempıony atandy. Al, 2021 jyly FIDE uıymdastyrǵan jyldam shahmattan álem kýboginde qola júldege ıe boldy», - dep málim etti basqarmanyń baspasóz qyzmetinen.
Eske sala ketelik, buǵan deıin atyraýlyq balýan jaǵajaıdaǵy sambodan álem chempıony atanǵanyn habarlaǵan edik.
