Atyraýlyq jas shahmatshy qyz álemniń úsh dúrkin chempıony atandy
Atyraý oblystyq dene shynyqtyrý jáne sport basqarmasynyń baspasóz qyzmetinen málim etkendeı, 5-11 maýsymda Grýzııanyń Batýmı qalasynda shahmattan jasóspirimder arasyndaǵy álem chempıonaty ótti.
«Álemdik dodaǵa 35 memleketten 426 shahmatshy qatysty. Qazaqstan namysyn qorǵaǵan atyraýlyq jas shahmatshy Zarına Nurǵalıeva «rapıd» jáne «blıts» túrinen synǵa tústi. Ol oılylar oıynyń «blıts» boıynsha altyn medal jeńip alyp, úshinshi ret álem chempıony atandy. Al, shahmattyń «rapıd» túrinen kúmis medalǵa ıe boldy», -dep habarlady basqarmanyń baspasóz qyzmeti.
Jasóspirim shahmatshy Zarına Nurǵalıevany Atyraý oblysynyń shahmattan aǵa jattyqtyrýshysy Sabyrbaı Ǵaısın men FIDE jáne halyqaralyq dárejedegi sport sheberi, Azııa chempıony Jánibek Amanov jattyqtyrady.
Zarına Nurǵalıeva 2019 jyly Belarýs Respýblıkasynda ótken álem chempıonatynda 12 jasqa deıingi jasóspirimder arasynda álem chempıony atanǵan. Al 2021 jyly FIDE uıymdastyrǵan jyldam shahmattan álem kýboginde qola júldege ıe bolǵan.
Byltyr Rýmynııa elinde jalaýy jelbiregen shahmattan álem chempıonatynda da Zarına Nurǵalıeva klassıka sanatynda 14 jasqa deıingi qyzdar arasynda úzdik oıyn kórsetti. Ol 11 kezeńde 9 jınady. Onyń bul jeńisi ekinshi ret álem chempıony atanýyna dańǵyl jol ashty.
Eske sala ketelik, buǵan deıin Atyraýlyq shahmatshy qyz álem chempıonatynda el namysyn qorǵaıtynyn habarlaǵan bolatynbyz.
Foto: Atyraý oblystyq deneshynyqtyrý jáne sport basqarmasy