Atyraýlyq jas kásipker Astanada alma baǵyn salatyn boldy - Jastar jyly

ASTANA. QazAqparat - Atyraýlyq 27 jastaǵy kásipker Tamıla Rozmetova Astanada tamshylap sýarý júıesine qosylǵan alma baǵyn salýdy josparlaýda. Alma baǵyn salý úshin jas kásipker Prezıdentten elordada arnaıy oryn belgilep berýdi sura5an bolatyn, dep habarlaıdy QazAqparat tilshisi.

Astana qalasynda «Táýelsizdik urpaqtary» ataýymen ótip jatqan Jastar jylynyń ashylý saltanatynda kásipker, «Nur Otan» partııasy men QHA múshesi Tamıla Rozmetova óziniń kásibi týraly aıtyp berdi.

«Jastar jyly - biz úshin úlken múmkindik. Meniń jasym 27-de. Fermermin. «Saraıshyq» fermasyn basqaryp otyrǵanyma 5 jyl boldy. Bul - Alpi eshkileriniń sútin óńdeıtin kásiporyn. Bizdiń fermada myńǵa tarta eshki bar. Sút óniminiń 15 túrin shyǵaramyz. Meniń hobbıim - irimshik óndirý. Men irimshiktiń birneshe túrin jasap kelemin. Olardyń birin ózimniń týǵan jerimniń qurmetine «Atyraý irimshigi» dep atadym. Bul óte paıdaly ári 100 paıyz sapaly ónim. Bizdiń ujymda 80-ge tarta qyzmetker bar. Olardyń 94 paıyzynyń jasy 36-ǵa deıingi jastar. Jas bolǵandyqtan, arman-tilekterimiz mol», - deıdi Tamıla Rozmetova.

Jas kásipker «Aýyl - el besigi» jobasy týraly aıta kele bul bastama jastar úshin aıtarlyqtaı áleýmettik lıft bola alatynyn atap ótti.

«Qazaqstan - almanyń tarıhı Otany ekenin men sizdiń maqalańyzdan oqyp bildim. Biz qazirgi tańda Mahambet almasyn qaıta jańǵyrtýdy qolǵa aldyq. Jastar jyly QHA janyndaǵy «Jańǵyrý joly» jastar qozǵalysy naqty jobalarǵa qoldaý bildirgimiz keledi. Osy kóktemde Astanada alma baǵyn salýdy josparlap otyrmyz. Biz qazirdiń ózinde osy baq úshin almanyń sýyqqa da, jelge de shydamdy 400 sortyn daıyndap qoıdyq. Sonymen birge, alma baǵyn tolyǵymen tamshylatyp sýarý júıesine qosamyz. Sizden elordada alma baǵyna oryn belgilep berýińizdi suraımyn», - dedi jas kásipker.

Osyǵan oraı Memleket basshysy alma baǵyna arnaıy oryn bólýdi Astana qalasynyń ákimi Baqyt Sultanovqa tapsyrdy.

Aıta ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.

Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.

Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.