Atyraýlyq jas bıshiler Makedonııada el namysyn qorǵaıdy
ATYRAÝ. QazAqparat 8-14 jas aralyǵyndaǵy balalar «Ezerskıı bıser - 2018» halyqaralyq balalar festıvalinde el namysyn qorǵaıdy, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, 7-12 tamyz aralyǵynda Makedonııa memleketinde jyl saıynǵy «Ezerskıı bıser - 2018» festıvali ótedi. Festıvalge 10-nan asa memleketten talantty balalar qatysady. Munaıly astana namysyn qorǵaýǵa «Mıras» balabaqshasynyń bıshiler toby men «Darhan» óner stýdııasynyń múshesi Aıaýlym Qanatqalıeva horeografııa nomınatsııasy boıynsha qatysady.
«Ótken jyly atyraýlyq jas ánshi Sanat Asýat Makedonııanyń Prılep qalasynda «Zvezdochkı» atty halyqaralyq mýzykalyq balalar baıqaýynda bas júldeni ıelengen bolatyn. Endigi baıqaýda bıshilerimiz Sanattyń jolyn qýyp, júldemen oralady degen senimdemiz»,- deıdi «Almaly.kz» halyqaralyq balalar óner festıvaliniń dırektory Sharbat Bısalıeva.
Aıta ketken jón, bıshiler 1-5 mamyr kúnderi Atyraýda ótken «Almaly.kz» V halyqaralyq balalar óner festıvaline qatysyp, Makedonııadaǵy baıqaýǵa joldama alǵan bolatyn.
