Atyraýlyq zeınetkerlerge erekshe syı jasaldy
ASTANA. QazAqparat - Atyraý oblysy, Maqat aýdanynyń 16 zeınetkerine Astananyń 20 jyldyǵyna oraı elordany tamashalaýǵa tegin joldama berildi, dep habarlaıdy QazAqparat tilshisi.
Atyraý oblysy, Maqat aýdandyq ákimdigi Elordanyń 20 jyldyǵy mereıtoıyna oraı aýdannyń damýyna ár salada qyzmet atqaryp eńbek sińirgen zeınetkerlerge Astanaǵa 5 kúndik tegin joldama berdi. Zeınetkerlerdiń jandarynda uıymdastyrýshy, medbıke jáne 2 erikti bar.
«Aýdan ákimdiginiń qoldaýymen óńirimizge eńbegi sińgen ardagerlerge osyndaı erekshe syı jasaldy. Bul kisilerdiń arasynda kezinde aýyl ákimi, depýtat bolǵan odan basqa bilim, temir jol salalarynda 40 jyldan astam eńbek etken qurmetti azamattar bar. Jáne kóbisi Astanaǵa birinshi ret kelýde, olar úshin bári qyzyq», -dedi uıymdastyrýshy, Maqat aýdandyq jastar resýrsy ortalyǵynyń jetekshisi Ásel Qarjaýova.
Ardagerler Astananyń tarıhı-mádenı jáne kórikti jerlerimen tanysyp aralap shyqty.
«Astananyń kóz toımas kórikti jerlerin aralap, tanysyp jatyrmyz. Kúni keshe ǵana tuńǵysh Prezıdent mýzeıine baryp, Elbasymyzdyń alǵash jumys istegen ornyn óz kózimizben kórdik. Bul biz úshin ol úlken qýanysh. Odan bólek mádenı basqada ortalyqtarǵa bardyq. El ordasy - Astanamyz jyl sanap gúldeı jaınap, kórkeıe bersin»,- dedi zeınetker, Maqat aýdandyq ardagerler keńesiniń tóraǵasy Səbıt Həlenov.
