Atyraýlyq úsh qutqarýshy jigit «Erligi úshin» medalimen marapattaldy

Oblystyq tótenshe jaǵdaılar departamenti baspasóz qyzmetiniń málimetinshe, Prezıdent Jarlyǵymen qutqarýshylar Nursultan Jumaǵazıev, Asylanbek Qumar men Rafaıl Zakırov «Erligi úshin» medaline ıe boldy. Marapatty qutqarýshylarǵa Tótenshe jaǵdaılar mınıstri ıÝrıı Ilın tapsyrdy.

Órt sóndirý qyzmetinde bólimshe komandıriniń orynbasary laýazymyn atqaratyn Rafaıl Zakırov bıylǵy 20 qańtarda kópqabatty turǵyn úıde bolǵan órtten adamdardy qutqarýda batyldyq tanytqan. Sol kúni departamenttiń dıspetcherlik pýltine saǵat 17:35-te Atyraý qalasyndaǵy Ǵ.Abdrahmanov kóshesinde ornalasqan №39 úıdiń kireberisi tútindep jatqany týraly habar túsken. Oqıǵa ornyna №1 mamandandyrylǵan órt sóndirý bóliminiń kezekshi bólimshesi jedel jetip, páterlerdiń birinde qart áıelmen birge balalardyń qalǵanyn anyqtaǵan. Bólimshe komandıriniń orynbasary, azamattyq qorǵaý starshınasy Rafaıl Zakırov úshinshi qabattyń balkonynan kómekke shaqyrǵan qart áıeldi kórgen.

«Jeke quramdy bastaǵan Rafaıl Zakırov qıyn jaǵdaıda qalǵan adamdardy qutqarýǵa jedel kiristi. Ol úsh ıindi baspaldaqpen aldymen balalardy qaýipsiz jerge túsirdi. Sodan keıin jeke quramnyń kómegimen qart áıeldi evakýatsııalady. Zardap shekkenderge alǵashqy medıtsınalyq kómek kórsetti», -dep málim etti departamenttiń baspasóz qyzmetinen.

Al, qutqarshýy Nursultan Jumaǵazıev 7 jeltoqsanda kópirden sekirgen júkti áıeldi qutqarýǵa belsene atsalysqan.

«Kópirden Jaıyq ózenine sekirgen áıeldi qutqarýǵa aldymen polıtsııa qyzmetkerleri qaıyqpen jetken edi. Biraq, áıelge alǵashqy kómek qajettigi týyndady. Sol kezde qutqarýshy Nursultan Jumaǵazıev Jaıyqtyń muzdaı sýyna sekirip, 50 metrdeı qashyqta turǵan qaıyqqa júzip jetti. Qaıyqta es-tússiz jatqan áıeldiń júregine massaj jasap, jasandy dem berý arqyly alǵashqy kómek kórsetti. Jaǵaǵa jetken soń jedel kezekshiniń orynbasary Asylanbek Qumar ekeýi júkti áıelge reanımatsııalyq kómek kórsetýdi odan ári jalǵastyrdy. Osylaısha, eki qutqarýshynyń is-áreketiniń nátıjesinde júkti áıel jedel járdem brıgadasy kelgenge deıin esin jıdy», -dep habarlady departamenttiń baspasóz qyzmeti.

Nursultan Jumaǵazıevtiń jasy – 22-de. Azamattyq qorǵaý salasyna 3 jyl buryn jumysqa ornalasqan. H.Dosmuhamedov atyndaǵy Atyraý ýnıversıtetin quqyqtanýshy mamandyǵymen bitirgen. Al, 27 jastaǵy Asylanbek Qumar – Reseı Federatsııasy Tótenshe jaǵdaılar mınıstrligi akademııasynyń túlegi.

«Bizdiń mindetimiz – qıyn jaǵdaıǵa tap bolǵan adamdardy qutqarý. Óıtkeni, biz – osy salany tańdaǵan, kez kelgen ýaqytqa qol ushyn sozýǵa daıyn turatyn qutqarýshylarmyz. Sol sebepten, árdaıym laýlap janǵan órttiń ortasyna kirýge de, qysta muzdaı sýǵa túsýge de daıynbyz. Kópirden sekirgen júkti áıelge alǵashqy medıtsınalyq kómek qajettigin sezinip, muzdaı sýǵa sekirdim. Sol kezde Jaıyqtyń sýyq sýynan denesi tońazyǵan júkti áıeldi qutqarýdy ǵana oıladym. Men muny erlikke balamaımyn. Meniń ornymda ózge qutqarýshylar bolsa, olar da dál osylaı áreket eterine kámil senemin», -degen pikirin bildirdi qutqarýshy Nursultan Jumaǵazıev.

Departament basshylyǵy qıyn jaǵdaıǵa qalǵan adamdardy qutqarýda jedel áreket etken qutqarýshylardy memlekettik nagradaǵa usynýdy jón kóripti.

Eske sala ketelik, buǵan deıin Táýelsizdik kúnine oraı bir top atyraýlyq marapattalǵanyn jazǵan bolatynbyz.