Atyraýlyq turǵyn jatyn bólmesin jylyjaıǵa aınaldyryp, esirtki ósirgen

ATYRAÝ. QazAqparat –Atyraý qalasynda 50 jastaǵy azamat úıiniń ishine jylyjaı jasap, quramynda esirtkisi bar ósimdik ósirip kelgen, dep habarlaıdy QazAqparat.

Oblystyq Polıtsııa departamenti baspasóz qyzmetiniń málimetinshe, Esirtki qylmysyna qarsy kúres basqarmasynyń qyzmetkerleri jedel-izdestirý is-sharalary kezinde úıinde esirtki ósirgen azamatty anyqtaǵan.

«Atyraý qalasynyń 1970 jylǵy turǵyny úıindegi jatyn bólmesinde jeldetkishi, temperatýrasy men jaryǵy bar shaǵyn jylyjaı jabdyqtap, quramynda esirtki bar ósimdik ósirýmen aınalysqan. Onyń úıin tekserý kezinde tórt ydysqa otyrǵyzylyp, ósip turǵan ósimdikter tabyldy. 50 jastaǵy azamattyń aıtýynsha, esirtki ósimdikterin satý úshin emes, ózi qoldaný maqsatynda ósirgen. Azamattan alynǵan qan analızi saraptamadan ótkizildi. Narkolog-dárigerdiń qorytyndysymen onyń qanynyń quramynda esirtki bary anyqtaldy», - dep habarlady oblystyq Polıtsııa departamentiniń bastyǵy Qamza Úmbetqalıev.

Qazir atalǵan azamatqa qatysty QR Qylmystyq kodeksiniń 300-babymen (Quramynda esirtki zattary bar, ósirýge tyıym salynǵan ósimdikterdi zańsyz ósirý) sotqa deıingi tergep-tekserý júrgizilýde.