Atyraýlyq turǵyn kóshege protıvogaz kıip shyqty
Oblystyq tótenshe jaǵdaılar departamenti bastyǵynyń orynbasary Jasulan Aqtaevtyń málimetinshe, 2 sáýirde tutanǵan órtti sóndirý áli jalǵasyp jatyr.
Qamys órtiniń tútini keshe keshkilik jáne búgin tańerteń Atyraý qalasyn tumshalap turdy.
«Atyraý oblysynda Kaspıı teńiziniń jaǵalaýyndaǵy janǵan qamys órti 89 gektar aýmaqty sharpydy. Búgin, 3 sáýir kúni tańerteń 82 gektardaǵy jalyn sóndirildi. Jalyn oshaǵy batpaqty jerde bolǵandyqtan, órtengen aýmaqqa jetý qıyndyq týdyryp tur. Soǵan qaramastan, tótenshe jaǵdaılar departamentinen 40 qyzmetker, 4 tehnıka, «Aqjaıyq» memlekettik tabıǵı rezervatynyń 30 qyzmetkeri men 9 tehnıkasy jumyldyryldy», -dep habarlady Jasulan Aqtaev.
«Aqjaıyq» memlekettik tabıǵı rezervatynyń bólim basshysy Ǵanı Aǵybaevtyń deregine qaraǵanda, qoryq aýmaǵy 15 myń 500 gektardy quraıdy.
«Sońǵy jyldary Kaspıı teńiziniń sýy keri qaıtyp, onyń orny batpaq bolyp jatyr. Batpaqty jerdegi qamys órtine birneshe faktor áser etedi. Bul – naızaǵaı jarqyly men adam faktory. Bul jolǵy órtke adam faktory áser etýi múmkin. Jel ekpiniń údeýi de órtti órshitip jiberdi», -dep málim etti Ǵanı Aǵybaev.
Atyraý qalasyndaǵy №7 emhananyń bas dárigeri Gúlnafıs Tańbaevanyń pikirine súıensek, aýadaǵy jaǵymsyz ıis sozylmaly aýrýlardy asqyndyryp jiberýi múmkin.
«Bizdiń oblysta sozylmaly aýrýlarǵa shaldyqqan 130-ǵa jýyq adam dıspanserlik esepte tur. Al, bizdiń emhananyń esebine 7 myńǵa jýyq naýqas tirkelgen. Onyń ishinde 29 bala bar», -dep habarlady Gúlnafıs Tańbaeva.
Qamys órtiniń tútini keshe keshkilik jáne búgin tańerteń Atyraý qalasyn tumshalap turdy. Osyǵan baılanysty kóshege protıvogaz kıip shyqqandar da bar.
Eske sala ketelik, buǵan deıinKaspıı jaǵalaýynda janǵan qamys tútini Atyraýdy basyp qalǵanyn jazǵan edik.
Keıin Kaspıı jaǵalaýyndaǵy qamys órti áli tolyq sónbegenin, oqýshylar men stýdentter búgin tústen keıin onlaın oqyp jatqanyn habarlaǵan bolatynbyz.