Atyraýlyq taekvondoshy álem chempıonatynyń irikteý týrnırinen altyn medal aldy

ATYRAÝ. QazAqparat – Atyraýlyq taekvondoshy álem chempıonatyna irikteý týrnırinen altyn medal aldy. Taǵy bir taekvondoshy qola medalǵa ıe boldy, dep habarlaıdy QazAqparat tilshisi.

Atyraý oblystyq dene shynyqtyrý jáne sport basqarmasynyń baspasóz qyzmetinen málim etkendeı, irikteý týrnıri Slovenııayń Lıýbıana qalasynda ótken.

«Aldaǵy mamyr aıynda Ázerbaıjan astanasy – Baký qalasynda taekvondodan álem chempıonatynyń jalaýy jelbireıdi. Tórtkúl dúnıeniń úzdik sportshylary baq synaıtyn dúbirli doda qarsańyndaǵy taekvondoshylar «Slovenia Open» reıtıngilik týrnırinde synǵa tústi. Qazaqstan quramasynyń sapynda atyraýlyq jattyqtyrýshy Sáýle Sardarova baptaǵan taekvondoshylar da baq synady. Týrnırdiń G-1 sanatyndaǵy dodada qarsylastarynyń bárin qapy qaldyrǵan Marııa Sevostıanova 57 keli salmaqta altyn medaldy jeńip aldy. Al, 67 keli salmaqta synǵa túsken Nuraı Husaıynova qola medaldy enshiledi», -dep habarlady basqarmanyń baspasóz qyzmeti.

Bul Marııa Sevostıanovanyń alǵashqy jeńisi emes. Ol byltyr Tegeran qalasynda taekvondodan áskerıler arasynda álem chempıony atanǵan bolatyn.

«Sol doda 57 keli salmaqta Marııa Sevostıanova altyn medalǵa ıe bolyp, álem chempıony atandy. Al, 49 kelide Nuraı Baýyrjanova kúmis jáne 73 kelide Jansel Denız qola medal jeńip aldy», -dep málim etti basqarmanyń baspasóz qyzmetinen.

Eske sala ketelik, buǵan deıin Atyraýlyq paradzıýdoshy halyqaralyq týrnırde «altyn» alǵanyn jazǵan edik.