Atyraýlyq sýretshi ózi turatyn aýylda galereıasyn ashty

ATYRAÝ. QazAqparat – Atyraýlyq sýretshi Tilek Halın ózi turatyn aýylda galereıasyn ashty. Qazir galereıada sýretshiniń 70-den astam kartınasy qoıylǵan, dep habarlaıdy QazAqparat tilshisi.

Inder aýdanyndaǵy Bódene aýylynyń turǵyny, Qazaqstan sýretshiler odaǵynyń múshesi Tilek Halın bala kúninen sýret salady. Mamandyǵy – sýretshi.

Máskeýdegi óner ınstıtýtynda qashyqtan bilim alǵan. Sýretshiniń osy kezge deıin 100-den kartına salǵan.

Aýyldaǵy orta mektepte beıneleý páninen dáris bergen sýretshi óleń de jazady. Osy kezge deıin bes kitaby jaryq kórgen.

Ózi turatyn aýylda 6 jyl buryn sýret galereıasyn ashqan. Qazir galereıaǵa óziniń 70-ten astam kartınasyn qoıǵan.

Ony aýylda turǵanmen álemge tanymal sýretshi deýge bolady. Óıtkeni, onyń týyndylary Túrkııa, Italııa, Germanııa elderine tanymal bolǵan.

Ózi kezinde Máskeýde ótken búkilodaqtyq shyǵarmashylyq konkýrstyń laýreaty atanǵan.

«Aýdan men oblystan, elordadan alystaǵy eldi mekenderdi aýyl dep ataıdy ǵoı. Shyn máninde bul – uly dalanyń bir bólshegi. Men uly daladan shabyt alyp, óleń jazamyn, sýret salamyn. Alańsyz jumys isteıtin sheberhanam joq. Biraq, kartınalarym men óleńderimdi úıde jazdym. Soǵan qaramastan, týyndylarym kóptiń kóńilinnen shyǵyp keledi», -deıdi Mahambet syılyǵynyń ıegeri Tilek Halın.

Onyń armany – qazaqtyń atyn, ózi turatyn Bódene aýylyn álemge tanytý. Ózi ashqan galereıasyn zańdastyryp, shań basqan týyndylaryn jurtshylyqqa keńinen tanytýdy kózdep otyr.

«Bizdiń aýyldyń janynda toǵaı bar. Sýretshi sol toǵaıdy aınytpaı beınelegen kartınasy «Talótkel» dep ataǵan. Galereıaǵa kelgen saıyn sol kartınaǵa qarap, sýretshiniń sheberligine tamsanamyn», -deıdi aýyl turǵyny Roza Sataeva.

Eske sala ketelik, budan buryn Atyraý oblysynda ulttyq qolónerdi qaıta jańǵyrtqan otbasy turatynyn jazǵan edik.