Atyraýlyq sportshylar Arman Áshimovke qoldaý kórsetti
ATYRAÝ. QazAqparat - Atyraý oblysynyń sportshylary aralas jekpe-jekten «M1 GLOBAL» tujyrymy boıynsha ýaqytsha álem chempıony, Ulttyq sport túri Jekpe-jekten tuńǵysh ret ótken álem chempıonatynyń jeńimpazy Arman Áshimovke qoldaý kórsetý maqsatynda beınerolık túsirdi, dep habarlaıdy QazAqparat tilshisi.
Sportshy Arman Áshimov Reseıde ótken chempıondyq kezdesýde qolynan alǵan jaraqatyna baılanysty kezdesýdi jalǵastyra almaǵan bolatyn.
«Basty maqsat - el abyroıyn kóterip júrgen batyrymyzǵa demeý bildirip, onymen birge ekenimizdi kórsetý. Chempıonymyzdyń tez jazylyp, úlken sporttyq arenalarda el baıraǵyn áli talaı jelbiretetinine senimdimiz»,-deıdi atyraýlyq sportshylar.
Aıta ketý kerek, beınerolıkte Armanǵa qoldaý kórsetýshiler qatarynda paradzıýdodan álem chempıonatynyń qola júldegeri Ánýar Sarıev, para-taekvandodan Álem, Eýropa jáne eki dúrkin Azııa chempıony Nurlan Dombaev, parajúzýden álem kýboginiń ıegeri Erjan Sálimgereev, mýaıtaıdan álem jáne Eýropa chempıony Dıdar Bolatov, pankratıonnan álem chempıonatynyń júldegeri Jasulan Hasımov jáne Atyraý boks klýbynyń jas sportshylary bar.
