Atyraýlyq sportshy Parazıada oıyndarynyń qola júldegeri atandy
ATYRAÝ. QazAqparat - Indonezııanyń Jakarta qalasynda Parazıada oıyndarynyń alǵashqy jarys kúni ótti. Qazaqstan ulttyq quramasynyń múshesi, Atyraýlyq sportshy Dmıtrıı Lı 100 metrge batterflıaı ádisimen júzýde qola júldeger atandy, dep habarlaıdy QazAqparat tilshisi.
Dmıtrıı Iran jáne Malaızııa memleketteriniń sportshylarynan keıin 1:07,77 ýaqyt kórsetkishimen úshinshi orynǵa ıe boldy.
«Bul kórsetkishime óte qýanyshtymyn. Júlde tuǵyrynda turǵandaǵy sezimimdi sózben jetkize almaımyn. Muny tek sol jerde bolǵan adam ǵana sezine alady. Maǵan qoldaý bildirip senim artqan barsha otandastaryma alǵysymdy aıtamyn», - deıdi Dmıtrıı Lı.
Atyraýlyq sportshylar oıyndar aldynda Qyrǵyzstan elinde jáne Taraz qalasynda oqý-jattyǵý jıyndaryn ótkizgen bolatyn. Odan buryn Germanııada ótken Álem kýbogynda júldeli oryndardan kórindi.
Aıta ketý kerek, Azııa oıyndary 13 qazanǵa deıin jalǵasady.
