Atyraýlyq sportshy pankratıonnan álemniń eki dúrkin chempıony atandy
Atyraý oblystyq dene shynyqtyrý jáne sport basqarmasynyń baspasóz qyzmetinen málim etkendeı, álem chempıonatynyń jalaýy Tashkent qalasynda jelbiregen.
«Ózbekstan Respýblıkasynyń astanasy – Tashkent qalasynda 1-2 mamyrda pankratıonnan eresekter arasynda álem chempıonaty ótti. Bul dodada Qazaqstan ulttyq quramasynyń sapynda atyraýlyq sportshy Ádilbek Qaıyrǵalı el namysyn qorǵady. Ol 77 keli salmaq dárejesinde tórt kezdesý ótkizdi. Aldymen Úndistan, Ózbekstan, Ýkraına elderiniń sportshylaryn qapy qaldyrdy. Al, aqtyq synda qazaqstandyq sportshyny utty», -dep habarlady basqarmanyń baspasóz qyzmeti.
Bul – atyraýlyq sporshy Ádilbek Qaıyrǵalıdyń álem chempıonatyndaǵy ekinshi jeńisi. Ol buǵan deıin 2019 jyly Italııada ótken álemdik doda chempıonat atanǵan. Al, 2021 jyly Ýkraınada jalaýy jelbiregen osyndaı dodada qola medalǵa ıe bolǵan.
Sondaı-aq, Tashkenttegi álem chempıonatynda taǵy atyraýlyq sportshy Aıkórik Qýandyqova kúmis júldeger atandy.
Eske sala ketelik, budan buryn atyraýlyq dzıýdoshy qyz Eýropa kýboginiń kúmis júldesin ıelengenin habarlaǵan bolatynbyz.
Atyraýlyq dzıýdoshy Esımgýl Kýıýlova Horvatııa Respýblıkasynyń Dýbrovnık qalasynda Eýropa Kýboginde 63 kelide baq synady. Ol irikteý kezeńinde qazaqstandyq dzıýdoshy Danııa men Horvatııadan, Gollandııa elinen qatysqan balýandardy utqan. Al, jartylaı fınalda Horvatııanyń taǵy bir sportshysynan basym túsken. Tek aqtyq synda Germanııa eliniń sportshysynan utyldy.