Atyraýlyq sportshy eki aıaǵynan qalaı aıyrylǵandyǵyn aıtyp berdi

Atalǵan basylymǵa Qýanysh Tájikov eki aıaǵynan qalaı aıyrylǵandyǵyn aıtyp berdi.

«Bul 1997 jyly boldy. Meniń jasym 11-de edi. Biz «Stroıkontorada» turdyq. Balalarmen birge jaqyn mańdaǵy Atyraý munaı óńdeý zaýytyna (AMÓZ) qatynaıtyn poıyzdarǵa minip, oınaǵandy jaqsy kóretinbiz. Sol kúni zaýytqa ketip bara jatqan, ótkelde turǵan poıyzdyń sońǵy jaǵyndaǵy tsısternalarynyń birine sekirip minip, birge qozǵalmaqshy bolyp, ilinip aldym. Bir kezde poıyz kerisinshe artqa qaraı júrip, aıaǵym taıyp ketti de, men astyna tústim. Birneshe tsısterna aıaqtarymdy ezip, lezde óte shyqty. «Kómektesińder!» dep aıqaılaýǵa ǵana shamam keldi. Biraz jerge deıin jyljyp barǵan poıyzdan sekirip túsken mashınıst maǵan qaraı júgirdi. Jylap, birdeńelerdi aıtyp jatty. Meni kóterip alyp, kólik júretin jolǵa deıin ákeldi de, taksıge otyryp, aýrýhanaǵa apardy...  

Aýyrsynǵany óz aldyna, muny estigende áke-sheshemniń urysatynyn oılap, qatty qoryqtym. «Papa-mamama aıtpańyzshy!» dep mashınıstten ótingenimdi bilemin. Álsin-álsin esimdi joǵalttym. Bir oıanǵanymda «jedel járdemde» kele jatqanymdy, endi bir esimdi jıǵanda aýrýhananyń jan saqtaý bóliminde jatyr ekenmin. Palatanyń terezesinen qarap, aǵyl-tegil jylap turǵan áke-sheshemdi kórdim, ar jaǵy esimde joq.

Aýrýhanada baqandaı alty aı jattym. «Aıaǵym qaıda?» dep, birneshe ret medbıkeler men dárigerlerge shý shyǵarǵan kúnderim de kóp boldy...",- dep eske alady sportshy.

Jarty jyldy aýrýhanada ótkizgesin, oıyn balasy ol jerden arbaǵa tańylǵan kúıde balalyqpen birjolata qosh aıtysyp shyǵady. Al kelesi jyly Almatydan protez jasaýmen aınalysatyn mamandar kelip, jasandy aıaq jalǵap berip ketedi.

2006 jyldyń mamyrynda Atyraý qalalyq jumyspen qamtý bólimindegiler Qýanyshtyń áke-sheshesiniń úıine telefon shalyp, 1 maýsym - Balalardy qorǵaý kúnine oraı múgedekter arasynda «Munaıshy» sport kesheninde spartakıada uıymdastyrylyp jatqanyn aıtyp, soǵan Qýanyshty qatysýǵa usynys jasaıdy. Kelisim bergen ertesi kúni mamandar avtokólikterimen kelip, ony «Munaıshy» sport keshenine aparady. Bul jerde Qýanysh alǵash ret ózi sekildi múmkindigi shekteýli adamdarmen ústel tennısinen saıysqa túsip, І oryndy jeńip alady. Sóıtip onyń sporttyq ómiri bastalady.

«Bir kúni QR eńbegi sińgen jattyqtyrýshy, QR bas bapkeri Baýyrjan Tahaýov janyma kelip, Atyraýda múgedekter arasynda voleıboldy otyryp oınaýdan sektsııa baryn aıtyp, qatysýǵa shaqyrdy. Men birden kelisimimdi berdim. Jattyǵýǵa kelgen jigitterdiń bastapqyda aıaq-qoly saý bolyp kórindi maǵan, tek kıinip-sheshinetin orynnan aıaqsyz shyǵyp jatty. Olarmen tanystym. Alǵashqy kúnnen-aq jattyǵý unaǵasyn, úzbeı qatynasyp júrdim, ustaz eńbegine daq túsirmeýge tyrystym», - deıdi Qýanysh.

Qýanyshtyń ishteı ózine bergen serti onyń ómirge degen kózqarasyn túbegeıli ózgertti. Ol sol 2006 jyly Atyraýda múgedekter arasynda ótken Qazaqstan chempıonatyna qatysyp, altyn alqany komanda múshelerimen bólisedi. Kelesi jyly bul komanda Taldyqorǵan qalasyndaǵy paralımpıadalyq oıyndarda ІІ oryn alyp, Brazılııanyń Rıo-de-Janeıro qalasynda jastar arasynda ótken álem chempıonatyna jóneledi.

«Bul meniń shetelge alǵash shyǵýym edi. Odan keıin osy sportqa kelýimniń arqasynda Polsha, Qytaı, Reseı jáne basqa da elderge sportshylarmen týrnırlerde saıysqa túsip júrdik. Al sportqa kelmes buryn bul meniń túsime de kirmegen edi.Biz Rıo-de-Janeıro qalasyndaǵy týrnırde sońǵy oryndy ıelendi. Biraq, jeńis pen jeńilistiń qatar júretinin biz bilemiz», - deıdi ol.

Qýanysh bolashaq jary Іńkármen osy «Munaıshy» sport keshenindegi jattyǵý zalynda tanysady. Іńkár ol kezde taekvando sektsııasyna qatysyp júrgen.

Qýanysh tek sportshy ǵana emes, arbada otyryp bıleýden de aldyna jan salmaıdy. Shymkentte ákim Kýbogy úshin ótken respýblıkalyq jarysta І oryndy, Pavlodar qalasyndaǵy paralımpıadada ІІ oryndy jeńip alady. Al Sankt-Peterbýrgte Halyqaralyq paralımpıadalyq komıtettiń qoldaýymen 18 elden qatysqan múgedek sportshylar arasynda arba ústinde sporttyq bıleýden ótken álem Kýboginde Italııada ótetin álem chempıonatyna qatysý quqyǵyn jeńip alady. Biraq, Qýanysh ol jarysqa qatyspaıdy, onymen tuspa-tus kelgen otyryp oınaý voleıbolynan ótetin jarysty tańdaıdy. 

«Men sportsyz otyra almaımyn ǵoı. Qazir tapanshamen atýdy úırenip júrmin. Odan aǵzaǵa kúsh túspeıdi. Qyrkúıektiń aıaǵynda respýblıkalyq jarys ótedi. Bul tórt jylda bir ret ótetin spartakıada. Sondyqtan men bul jarystan qalaıda І oryn alýym kerek. Jáne ózimniń voleıbol komandama qaıta oralýymdy asyǵa kútip júrmin»- deıdi sportshy. 

Búginde Qýanysh pen Іńkár Qadirjan, Suńqar esimdi súıkimdi uldaryn tárbıelep, ósirip otyr.