Atyraýlyq sportshy djıý-djıtsýdan álem chempıony atandy
ATYRAÝ. QazAqparat – Atyraýlyq sportshy djıý-djıtsýdan álem chempıony atandy, dep habarlaıdy QazAqparat.
Oblystyq sport jáne dene shynyqtyrý basqarmasy baspasóz qyzmetiniń aqparatyna qaraǵanda, Birikken Arab Ámirliginiń astanasy – Abý-Dabı qalasynda djıý-djıtsýdan jasóspirimder, jastar jáne eresekter arasynda álem chempıonaty ótken.
«Halyqaralyq dodaǵa álemniń 65 elinen 1 500 sportshy qatysty. Qazaqstan namysyn qorǵaǵan sportshylardyń arasynda Aıbar Esenǵalıev bastap barǵan atyraýlyq djıý-djıtsýshylar da bar. Onyń ishinde djıý-djıtsýdiń faıtıng bóliminde 56 kelide synǵa túsken Jeńis Nurlybaev álem chempıony atandy. Al, jastar arasynda Arýjan Qýanyshqyzy (U18, 44 keli), Erlan Abatbaev (U18, 50 keli), Azamat Ábýov (U16, 55 keli) pen Beıbarys Jumabaev (U16, 42 keli) kúmis júldege ıe boldy» -dep habarlady basqarmanyń baspasóz qyzmeti.
Eske sala ketelik, buǵan deıin atyraýlyq balýan sambodan Tatarstan prezıdenti kýbogynyń ıegeri atanǵanyn habarlaǵan edik.
