Atyraýlyq sheber Nurlybek Bısembaev aıyna 100 dombyra jasaıdy
Atyraý qalasyna taıaý ornalasqan Bereke aýylynda turatyn Nurlybek Bısembaevtyń mamandyǵy – dombyrashy. Mamandyǵyn qazaqtyń ulttyq aspabymen baılanystyrǵan ol aldymen D.Nurpeıisova atyndaǵy halyq mýzykasy akademııasy janyndaǵy mýzyka kolledjin bitirgen. Keıin H.Dosmuhamedov atyndaǵy Atyraý ýnıversıtetinen joǵary bilim alǵan.
«Bala kezimnen dombyraǵa qyzyǵýshylyǵym oıandy. Joǵary bilim alǵannan keıin Bereke aýylyndaǵy mektepte dombyra klasyn ashyp, balalarǵa dáris berdim. Qolym bosaǵan sátte dombyra jasaýdy qolǵa aldym. Qazir tapsyrys elimizdiń ár óńirinen túsedi. Óıtkeni, balalardyń sapaly dombyrada oınaǵanyn qaladym. Ulttyq aspaptyń daýysy kúmbirlep, taza shyǵýy kerek. Al, bazarlar men ózge saýda oryndarynda satylatyn aspaptardyń sapasy kóńilden shyqpaıdy», - deıdi Nurlybek Bısembaev.
Onyń aıtýynsha, ákesi dombyra jasaýmen aınalysqan. Ózi dombyra jasaýdy ákesinen úırengen.
«Ákemniń qolónerdegi jolyn jalǵastyrýdy maqsat ettim. Sóıtip, dombyrany jasaýǵa bet burdym. Qazir alǵashqy jasaǵan týyndym Saraıshyq aýylyndaǵy mýzeıde tur. Dombyra jasaýdy meńgergen soń, sheberhana ashtym. Qazir dombyra jasaýdy kásibime aınaldyrdym», -deıdi jergilikti sheber.
Nurlybek Bısembaev kásibin bastaý úshin memlekettik baǵdarlama arqyly jeńildetilgen nesıe alǵan. Sol qarjyǵa stanoktar men qajetti materıaldardy satyp, sheberhana ashqan.
«Qazir sheberhanada aıyna 100-ge jýyq dombyra jasaımyz. Dombyra jasaýǵa aǵalarym kómektesedi. Birneshe adamdy jumysqa aldym. Almatydan úıeńki, qaraǵaı, qara aǵash, qyzyl aǵashty tapsyryspen aldyramyn. Biz jasaǵan dombyranyń baǵasy materıaly men jasalýy kúrdeliligine baılanysty bolady. Ulttyq aspaptyń baǵasy 20 myń teńgeden bastalady. Kásibı dombyrashylar qymbat dombyraǵa tapsyrys beredi», -deıdi Nurlybek Bısembaev.
Ol bolashaqta dombyra sheberhanasyn keńıtip, aıyna 5 myń jasaýdy kózdep otyr. Bul úshin qosymsha stanoktar satyp almaq.
«Meniń maqsatym – kóp aqsha tabý emes, sapaly ulttyq aspap jasaý. Ózim dombyrashy bolǵandyqtan, dombyranyń dybysyn birden ajyratamyn. Sol sebepten, dombyra jasaý kezinde buǵan erekshe nazar aýdaramyn. Eń bastysy, mýzyka mektepterindegi balalar sapaly aspapta oınaýdy úırenýi kerek», -deıdi sheber.
Eske sala ketelik, budan buryn Atyraýlyq sheber Ilona Kım shaıyrdan túrli buıym jasaıtynyn habarlaǵan edik.
