Atyraýlyq sheber Ilona Kım shaıyrdan túrli buıym jasaıdy
Qolónerge ańsary aýyp, kádimgi shaıyrdy kádege asyrǵan Ilona Kım eki mamandyqty meńgergen. Biri – aǵylshyn tili pániniń muǵalimi, ekinshisi – týrızm menedjeri. Sheteldik kompanııada 12 jyl jumys istegen.
«Atyraýda ómirge keldim. Bala kezimnen qolóner buıymdaryna qyzyǵýshylyǵym oıandy. Sol sebepten, sheteldik kompanııadaǵy táýir jumysymdy tastap, bastapqyda sýret salyp júrdim. Keıin shaıyrdy «ılep», túrli buıymdar, oıynshyqtar jasaýdy qolǵa aldym. Óıtkeni, ózgeniń jasaǵan nársesin qaıtalaǵym kelmedi. Shıkizat retinde Reseıde shyǵarylǵan suıyq epoksıdti shaıyrdy paıdalanamyn. Onyń 1 lıtri 14 myń teńge turady», -deıdi Ilona Kım.
Qazir shaıyrdan úıde paıdalanatyn səndik buıymdar, sývenırler, saǵat pen kartınalar jasaıdy. Tipti tátti konfetter salýǵa arnalǵan ydysty da jasap shyǵarǵan. Al, jańa jyl qarsańynda shyrshaǵa iletin túrli oıynshyqtar daıyndady.
«Aldymen shaıyrdy 10 mınýttaı aralastyramyn. Shaıyr 20-30 mınýtta qatyp qalady. Sol sebepten, oıǵa alǵan buıymdy tez jasaý kerek. Al, qatqan shaıyrdy qaıta balqytý múmkin emes. Bir buıym úsh kúnde daıyn bolady», -deıdi shaıyr «ıleıtin» sheber.
Oǵan Nur-Sultan men Almatydan, Kókshetaý men Qostanaıdan tapsyrystar túsken. Máselen, Kókshetaý qalasynan úsh aptada 70 oıynshyqty jasaýǵa tapsyrys bolǵan. Bul tapsyrysty kelisilgen merzimde daıyndap bergen.
Eske sala ketelik, buǵan deıin atyraýlyq ǵalymnyń shubat pen qyzylshadan jasalǵan «Sofmaıa» degen sýsyny baryn jazǵan bolatynbyz.
