Atyraýlyq sarbazdyń súıegi týǵan jerine jerlendi
Quspanǵalı Boranbaev 1941 jyly 19 jasynda maıdanǵa attanǵan, Parfınsk aýdanyndaǵy Tómengi Novgorodta bolǵan shaıqasta erlikpen qaza tapty. Ótken jyly osy aýdanda izdestirý toby 489 jaýyngerdiń súıegin tapqan, solardyń arasynda atyraýlyq sarbaz da bar. Batyr súıegin jerleý rásimine Quspanǵalı Boranbaevtyń aǵaıyndary, ardagerler, jastar, izdeý toby músheleri qatysty.
Atyraý oblysynyń ákimi Nurlan Noǵaev soǵys kezinde habarsyz ketken jaýyngerdiń súıegin elge jetkizý jumystary qalaı júrgenin aıtty.
«Bizdiń búgingi ashyq aspanymyz úshin janyn qıǵan batyrymyzdy týǵan jer topyraǵyna tabystap otyrmyz. Quspanǵalı aǵanyń taǵdyry týraly habar jetken boıda oblystyq arhıvterden aǵaıyn-týystary jaıly derekter izdedik. Kórshiles Astrahan oblysyndaǵy arhıvterge habarlastyq. Biraq eshqandaı málimet shyqpady, - deıdi Nurlan Noǵaev. - Jyl boıy reseılik áriptestermen kelissózder júrgizdik. Sarbaz súıegin týystarynyń baryn rastaıtyn qujat bolǵan kezde ǵana berýge kelisti».
Jyl boıy júz tom arhıv materıaldary qaraldy, biraq izdeý jumystary nátıjesiz boldy. Oblys basshylyǵy reseılikterden Quspanǵalı Boranbaevtyń súıegin týǵan jerine jerleýge kelisim aldy.
«Barlyq máseleler sheshilip, súıekti Atyraýǵa ákelýge kelisim alynǵan kezde Quspanǵalı Boranbaevtyń týystary tabyldy degen habar keldi. Munyń bári soǵysqa qatysqan batyrlarǵa degen qurmetti kórsetedi. Urpaqtarynyń arqasynda Quspanǵalı aǵanyń rýhy týǵan topyraǵymen qaýyshty», - dep atap ótti Nurlan Noǵaev.
Quspanǵalı Boranbaevtyń týystaryn izdeýge Qurmanǵazy aýdandyq ardagerler keńesiniń tóraǵasy Orynǵalı Qumarǵalıev kóp jumys istedi.
«Bizdiń aýdannan soǵysqa 7480 jaýynger attandy, sonyń jartysyna jýyǵy maıdan dalasynan oralmady, - deıdi Orynǵalı Qumarǵalıev. - 76 jyldan keıin súıegi tabylyp, týǵan topyraǵymen tabysqan Quspanǵalı Boranbaevtyń taǵdyry kóp kezdespeıtin jaǵdaı. Ár adam týǵan jerinde máńgilik tynys tabýdy armandaıdy. Quspanǵalı aǵanyń osy armany oryndaldy».
Rızashylyq sózderin Quspanǵalı Boranbaevtyń týystary da aıtady. Sonyń ishinde Aqtóbedegi Álııa Moldaǵulova atyndaǵy jáne Reseıdegi ıAroslav oblysy Rybınsk qalasyndaǵy «Za Otvagý» izdestirý toptarynyń músheleri kóp eńbek sińirdi. Olar sarbazdyń medalony men aty-jóni oıylyp jazylǵan qasyǵyn tapqan.
Jaýynger súıegin jetkizý protsesi qıyndyq keltirmedi. Qazaqstannyń Reseıdegi elshiligi, Sankt-Peterbýrg pen Astrahandaǵy bas konsýldyǵy qoldaý kórsetti. Solardyń septigimen soǵysta qaza tapqan jaýynger súıegi ushaqpen aldymen Astanaǵa, sosyn Atyraýǵa jetkizildi.
Kópshilikke soǵys 1945 jyly bitken bolyp kórineri anyq. Biraq maıdannan oralmaǵan myńdaǵan sarbaz ben olardyń týystary úshin shaıqas alańynda qalǵan súıekterdiń týǵan topyraqpen qaýyshqan kezinde ǵana aıaqtalady. Jerlesimiz Quspanǵalı Boranbaev úshin soǵys 2018 jyly támamdaldy.
