Atyraýlyq polıtsııa «telefon» úshin mıllıon teńge aıyppul tóleıdi
ATYRAÝ. QazAqparat - Atyraýda tergeýdegi adamǵa telefon ákelip berýge ýáde bergen polıtsııa qyzmetkerine mıllıon teńge aıyppul salyndy, dep habarlaıdy «QazAqparat» HAA tilshisi.
«Sot tergeýi barysynda Atyraý oblysy qylmystyq-atqarý júıesi departamenti tergeý oqshaýlaǵyshynyń ÝG-157/1 mekemesiniń kúzet jáne rejim bóliminiń ınspektory tergeýdegi adamǵa telefon ákelip berýge ýáde bergen. Osylaısha zań buzǵan. Qyzmeti úshin polıtsııa qyzmetkeri tergeýdegi adamnyń tanysynan 20 myń teńge alyp, artynsha ustaldy.
Sotta ınspektor kinásin moıyndaý týraly mámile túrinde protsessýaldyq kelisim jasady, ony QR QK «para alý» baby boıynsha aıypty dep tanydy jáne oǵan alǵan somasynyń 50 ese kólemi - 1 mln teńge aıyppul túrinde jaza taǵaıyndaldy. Qazir burynǵy qyzmetker ómir boıyna memlekettik qyzmette jumys isteý quqyǵynan aıyryldy», - delingen sottyń baspasóz baıanynda.
