Atyraýlyq polıtseıler múmkindigi shekteýli balalarǵa kontsert qoıyp berdi
ATYRAÝ. QazAqparat - «Baqytty balalyq shaqty qorǵaý» jobasy aıasynda Atyraý oblysy polıtsııa departamentiniń uıymdastyrýymen qaıyrymdylyq kontserti ótti, dep habarlaıdy QazAqparat tilshisi.
«Shańyraq» balalar úıi, «Malenkaıa strana» qoǵamdyq uıymy, «Umtylys» qorynyń balalary men ata-analary kórermen retinde arnaıy shaqyrtyldy. Júrý múmkindigi qıyndaý balalarǵa polıtsııa tarapynan arnaıy avtokólikter bólinip, mádenıet úıine jetkizilýi qamtamasyz etildi.
Sharanyń qonaǵy retinde sahna tórinde atyraýlyq ánshi Beıbit Qorǵan óner kórsetti. Sahnada jerles juldyzben júzdesip, birge án salyp, syılyqtarǵa ıe bolǵan balalardyń qýanyshynda shek bolmady.
Kontserttik baǵdarlamada ánshiden ózge «Shańyraq» otbasy úlgisindegi balalar úıiniń tárbıelenýshileri, polıtsııa departamentiniń kórkemónerpazdar ujymy da óner kórsetti.
Kishkentaı kórermenderdiń ortasynda byltyr polıtseıler alyp bergen kópfýnktsııaly arbasymen kelgen Aqtolqyn Tashý da boldy.
Atalǵan sharaǵa qoldaý bildirip, týǵan jerine kelgen Beıbit Qorǵanǵa Polıtsııa departamenti bastyǵynyń orynbasary, polıtsııa polkovnıgi N.Kýshenov alǵys hat tabys etti.
«Balalardyń eń bolmasa bir saǵattyq ómirine shýaq syılaı alǵanymyz úshin qýanyshym sheksiz. Osyndaı sharaǵa arqaý bolǵan Polıtsııa departamentiniń bastyǵy Aıan Sábıtulyna erekshe alǵysymdy bildirgim keledi», - dep sharany qorytyndylady ánshi Beıbit Qorǵan.
Aıta ketý kerek, QR ІІM-niń «Baqytty balalyq shaqty qorǵaý» jobasy aıasynda qaıyrymdylyq kontserti buǵan deıin elimizdiń birneshe qalalarynda ótken bolatyn.
