Atyraýlyq polıtseıler kóshege «esirtki jasyrdy»: turǵyndardyń áreketi qandaı boldy
Atyraý oblystyq polıtsııa departamentiniń esirtki qylmysyna qarsy is-qımyl basqarmasy bastyǵynyń orynbasary Roman Ermuhanovtyń málimetinshe, Atyraý qalasynda esirtkini jasyryn oryndarǵa jetkizýge baılanysty áleýmettik eksperıment ótkizilgen. Polıtseıler as sodasyn arnaıy zip-paketterge salyp, qala kóshelerine jasyrǵan.
«Maqsatymyz – turǵyndardyń áreketin baqylaý. Turǵyndardyń deni mán-jaıdy bilýge tyryspady. Biraq, «102» nómirine, jaqyn mańdaǵy polıtseılerge habar bergender bar. Oblys turǵyndary men qonaqtaryna esirtkini jasyrýǵa qatysty qylmystyq oqıǵalarǵa kýá bolsa, quqyq qorǵaý organdaryna jedel habarlaý qajettigin eskertemiz», - dep málim etti Roman Ermuhanov.
Aıtýynsha, oblysta zańsyz aınalymnan 5 keliden astam esirtki zattary tárkilengen.
«Atyraý oblysynda jyl basynan beri esirtki qylmysyna qatysty 45 qylmystyq quqyq buzýshylyq deregi tirkeldi. Onyń ishinde aýyr jáne asa aýyr sanatqa jatatyn 25 derek bar. Al, kámeletke tolmaǵan jasóspirimderdiń 2 qylmysty jasaǵany anyqtaldy. Zańsyz aınalymnan jalpy salmaǵy 5 keli 486,29 gramm esirtki zattary tárkilendi», - dep habarlady Roman Ermuhanov.
Eske sala ketelik, buǵan deıin Atyraýda sıntetıkalyq esirtkini jasyryn orynǵa jetkizýshi ustalǵanyn jazǵan bolatynbyz. Atyraý qalasynda sıntetıkalyq esrtkini jasyryn orynǵa tyǵyp júrgen 1993 jylǵy kúdiktini ustaldy. Kúdiktiden 3 paketke salynǵan aq tústi untaq zaty, túrli tústi orama, zergerlik elektrondy tarazylar, untaq salynǵan 2 ydys, aq tústi untaq zaty bar zip-paketter, bos 50 zip-paket jáne kúdiktige tıesili jabystyrǵysh pen Telegram messendjerine jasyryn tyǵý týraly jazbasy bar uıaly telefon tárkilendi. Osy aıǵaq zaty arqyly qylmystyq is tirkeldi. Saraptama qorytyndysymen alynǵan zattardyń salmaǵy 173,9 gr ekeni anyqtaldy.
