Atyraýlyq palýan sambodan álem kýboginiń ıegeri atandy
ATYRAÝ. QazAqparat – Atyraýlyq palýan Aıbek Abdılov sambodan álem kýboginiń ıegeri atanyp, halyqaralyq dárejedegi sport sheberi normatıvin oryndady, dep habarlaıdy QazAqparat.
Atyraý oblystyq sport jáne dene shynyqtyrý basqarmasy baspasóz qyzmetiniń málimetinshe, 25-26 naýryzda Reseı Federatsııasynyń astanasy – Máskeýde sambo kúresinen Harlampıev atyndaǵy álem kýbogi ótken.
«Harlampıev atyndaǵy álem kýbogi 1980 jyldan beri dástúrli túrde ótkizilip keledi. Bıyl oǵan 16 elden 300-den astam sportshy qatysty. Dúbirli dodada atyraýlyq sportshy Aıbek Abdılov 64 keli salmaqta baq synady. Ol irikteý kezeńinde reseılik sportshydan basym tústi. Jartylaı fınalda qyrǵyz palýanynan aılasyn asyrdy. Al, aqtyq synda ózbek sportshysyn utyp, Harlampıev atyndaǵy álem kýboginiń ıegeri atandy» -dep habarlady basqarmanyń baspasóz qyzmetinen.
Aıbek Abdılov álemdik saıysta halyqaralyq dárejedegi sport sheberi normatıvin oryndady.
Eske sala ketelik, budan buryn atyraýlyq jas palýan álem chempıony atanǵan bolatyn.
