Atyraýlyq oqýshylar sýsabynnyń jańa túrin jasap shyǵardy

ATYRAÝ. QazAqparat – Atyraýlyq oqýshylar sýsabynnyń jańa túrin usyndy. Sýsabynnyń quramynda hımııalyq qospalar joq, dep habarlaıdy QazAqparat tilshisi.

Atyraýdaǵy Abaı aty berilgen oqýshylar ortalyǵynda 7-11-synyp oqýshylary ǵylymı jobalarmen aınalysyp júr.

Munda oqýshylar úshin STEAM baǵytynda bilim berýge arnalǵan JasSpace baǵdarlamasy ashylǵan.

Atalǵan baǵdarlamamen «Máńgi tiri sý» jazǵy kýrsynan qosymsha bilim jetildirgen oqýshylar arasynda Arýjan Abdýlǵazıeva, Bıbinur Ǵabdyjan men Ýálıthan Batyrbaev ta bar.

Jas ónertapqyshtar sýsabynnyń jańa túrin jasap shyǵardy. Olar sýsabyndy Eco-way dep ataǵan.

«Bul tabıǵı ónimniń quramyna sýlfat, hlorıt sekildi hımııalyq qospalar qosylǵan joq. Biz kúndelikti tutynýǵa sýsabyndy tek tabıǵı qospalar men organıkalyq zattardan ǵana jasadyq. Jańa sýsabyn shashty nárlendiredi, qaıyzǵaqtan tazartady. Ózim tól sýsabynymyzdy qoldanyp júrmin», - deıdi Ýálıthan Batyrbaev.

«Máńgi tiri sý» jazǵy kýrsynyń treneri Ásel Ońdashevanyń aıtýyna qaraǵanda, oqýshylar jasaǵan tabıǵı sýsabynnyń adamnyń densaýlyǵyna esh zııany joq.

Sol sebepten, bul sýsabyndy kishkentaı balalardy jýyndyrýǵa paıdalanýǵa ábden bolady.

«Qazirgi sýsabyndardyń quramyndaǵy sýlfattar allergııa týǵyzyp, shashtyń túsýine áser etýi múmkin. Muny tutynýshylar eskermeıdi. Al, atyraýlyq oqýshylar jasap shyǵarǵan sýsabynnyń quramynda sýlfat joq. Adamnyń kózin ashytpaıdy. Endi jobany áli de jetildirýdi oılastyryp otyrmyz», -deıdi Ásel Ońdasheva.

Eske sala ketelik, buǵan deıin Atyraýda oqýshylar bıleıtin robot qurastyrǵanyn jazǵan bolatynbyz.