Atyraýlyq oqýshylar kartop qabyǵynan bıoplastık óndirdi

ATYRAÝ. QazAqparat – Atyraýdaǵy Nazarbaev Zııatkerlik mektebiniń oqýshylary kartop qabyǵynan bıoplastık óndirýdi usynyp otyr, dep habarlaıdy QazAqparat.

Atalǵan bilim ordasynyń oqýshylary Hadısha Sagenova men Nuraı Qospaeva kúndelikti azyq retinde qoldanylatyn kartoptyń qabyǵynan bıoplastık óndirý jobasyn ázirlegen. Qos jasóspirim bul jobany karantın kezindegi 9 aıda úı jaǵdaıynda júzege asyrǵan.

Jobada qoldanylatyn ıngredıentterdiń barlyǵy qaýipsiz. Oqýshylar tájirıbeniń negizgi komponenti retinde kartoptyń qabyǵyn, dálirek aıtsaq krahmaldy alǵan.

«Bıoplastıktiń quramyna ár úıden tabylatyn reagentter men ósimdikterdiń qaldyǵy qoldanylady. Biz bul jobamyz arqyly qorshaǵan ortany qaldyqtan tazartyp, aýa sapasyn jaqsartýǵa arnalǵan BUU-nyń Turaqty damý salasyn qoldaýdy kózdeımiz», – deıdi joba avtorlary Hadısha men Nuraı.

Oqýshylardyń aıtýynsha, qazir bıoplastıktiń quramy jetildirile túspek. Maqsat – shıkizatty qaıta óńdeý arqyly qorshaǵan ortaǵa keletin zalaldy azaıtý. Bul úshin jańa ónimge polıpropılen men polıetılen qaldyǵyn qosý kózdelgen.

Eske sala ketelik, budan buryn atyraýlyq oqýshylar Telegram-da kitaphana ashqan bolatyn.