Atyraýlyq oqýshylar halyqaralyq ǵylymı jobalar saıysynyń úzdigi atandy
ATYRAÝ. QazAqparat –Atyraý qalasyndaǵy oblystyq daryndy balalarǵa arnalǵan mamandandyrylǵan mektep-lıtseı-ınternatynyń eki oqýshysy halyqaralyq ǵylymı jobanyń úzdigi atandy, dep habarlaıdy QazAqparat.
Oblystyq bilim basqarmasy baspasóz qyzmetiniń málimetinshe, Brazılııanyń Novo-Gambýrg qalasynda «MOSTRATEC» 35-shi halyqaralyq bilim kórmesi ótken. Oǵan álemniń 35 elinen 752 oqýshy qatysty. Olardyń arasynda Qazaqstannyń mektepterinen 25 oqýshy bar. Al Atyraý oblystyq daryndy balalarǵa arnalǵan mamandandyrylǵan mektep-lıtseı-ınternatynyń 11-synyp oqýshysy Aqbota Jubatqan matematıka páninen І oryndy ıelengen. Taǵy 11-synyp oqýshysy Aıdanýr Demırdjı tarıh páninen ІІІ oryn alǵan.
«Jaz maýsymynyń aıaqtalýyna on shaqty kún qalǵanda synyp jetekshim «Mostratec» atty halyqaralyq ǵylymı jobalar saıysy ótetinin habarlady. Sol habardy estigen soń daıyndala bastadym. Alaıda, pandemııaǵa baılanysty atalǵan saıys qashyqtan ótetin boldy. Soǵan qaramastan, saıys óte qyzyqty, ári tájirıbege toly bolyp ótti. Baıqaý «Jitsi meet» atty vıdeo-konferentsııalarǵa arnalǵan mobıldi qosymshanyń kómegimen ótti. Biz óz jobamyzdy aǵylshyn tilinde qorǵadyq. Bul saıystan kóp tájirıbe jınadyq», - deıdi Aqbota Jubatqan.
Atyraýlyq oqýshylardy jobaǵa qyzdar lıtseıiniń beıindi oqý isiniń meńgerýshisi Oksıýz Rahman men H.Dosmuhamedov atyndaǵy Atyraý memlekettik ýnıversıtetiniń oqytýshysy Aqqabyl Abırov daıyndaǵan.
Eske sala ketelik, buǵan deıin atyraýlyq oqýshylardyń ǵylymı jumysy halyqaralyq jınaqqa engenin jazǵan bolatynbyz.
