Atyraýlyq oqýshy ósimdikten boıaý alýdyń jańa tásilin usyndy
Oblystyq Bilim basqarmasy baspasóz qyzmetiniń málimetinshe, Aınur Muratova Mahambet aýdanyndaǵy Qosaral orta mektebinde oqıdy. Ol «Daryn» respýblıkalyq-ǵylymı praktıkalyq ortalyǵy uıymdastyrǵan ál-Farabı atyndaǵy respýblıkalyq ǵylymı jobalar baıqaýyna qatysqan. Baıqaýda «Tabıǵı ındıkator alý jáne qoldaný» taqyrybynda joba qorǵap, júldeli 1-oryndy jeńip alǵan.
Ǵylymǵa den qoıǵan oqýshynyń ǵylymı jetekshisi Sandýǵash Qabazovanyń aıtýynsha, onlaın rejımde ótken baıqaýǵa elimizdiń barlyq óńirinen 263 oqýshy qatysqan.
«Oqýshym ekeýmiz buryn zerttelmegen, biraq kópten oıymyzda júrgen taqyrypty tańdadyq. Aınur zertteýinde tabıǵı shıkizattan qolmen alýǵa bolatyn ındıkatorlardy (tabıǵı boıaýlardy) tájirıbe júzinde dáleldep kórsetti. Tabıǵı ósimdikterdiń quramy qorshaǵan ortanyń áserine baılanysty túsin jıi ózgertetinin anyqtady», - dedi Sandýǵash Qabazova.
Al, Aınur Muratovanyń sózinshe, óziniń ǵylymı jańalyǵyn aldaǵy ýaqytta hımııa sabaǵynda zertteý túrinde ǵana emes, turmysta da qoldanýǵa bolady. Ol sondaı-aq, ydys jýýǵa arnalǵan «Mıf», «Fairy», «AOS» suıyqtyqtary men hosh ıisti sabyndardyń barlyǵy osyndaı hımııalyq árekettesý arqyly alynatynyn jetkizdi.
«Turmysta keńinen paıdalanylyp júrgen jýǵysh zattar hımııa tilimen aıtqanda, siltilik jáne álsiz siltilik ortada daıyndalady. Sondyqtan, tabıǵı ósimdikterden boıaý alý taqyrybyn aldaǵy ýaqytta keńirek zertteımin. Tabıǵı ósimdikterdiń quramyn, olardan tabıǵı boıaý alý zertteýleri mektep baǵdarlamasynyń 5, 6-synyptardaǵy Jaratylystaný, 7-synyptyń Hımııa oqýlyqtaryna engizilse, oqýshylardyń ǵylymǵa yntasy arta túser edi», - deıdi Aınur Muratova.
Eske sala ketelik, budan buryn atyraýlyq oqýshy aloe ósimdiginen sýsabyn men ıogýrt jasap shyǵarǵanyn jazǵan edik.
