Atyraýlyq oqýshy kýbıkti 12 sekýnd ishinde qurastyryp shyqty
ATYRAÝ. QazAqparat - Atyraýda alǵash ret Rýbık tekshesin jyldamdyqqa qurýdan aımaqtyq chempıonat ótti. Semeı, Almaty, Shymkent jáne Aqtóbe oblystarynan 60-tan astam daryndy jas Rýbık birligin ýaqytqa qurýdan baq synasty, dep habarlaıdy QazAqparat.
Dúbirli dodanyń ádil ótýin baqylaýǵa Ýkraınadan táýelsiz sarapshylar kelgen. Eki kúnge sozylǵan zııatkerlik dodada jańa rekordtar men esimder belgili boldy. Baıqaýǵa kelgender 2h2, 3h3, «megamıks», «pıramıda» syndy kategorııalar boıynsha baq synady.
«Bul meniń Qazaqstanǵa alǵash ret kelýim. Sizderde Rýbıkti qurastyrý qarqyndy damyp keledi. Osydan bes, on jyl buryn federatsııa bólimsheleri tek Astana men Almaty qalalarynda bolǵan. Al qazir eldiń barlyq aımaqtarynda KSF ókilderi jumys isteıdi. Meniń baıqaǵanym, Qazaqstanda myqty spıdkýberler kóbeıip keledi. Al Atyraýdaǵy chempıonatqa keler bolsaq, mundaǵy qatysýshylardyń 90 paıyzy jasóspirimder. Balalar úshin bul alǵashqy tájirıbe», - deıdi WCA qaýymdastyǵynyń Ýkraınadaǵy ókili Stepan Djýrılo.
Saıysta Ázız Oljaǵalı, Samalbek Kelimov, Ámirhan Islamovtar aldyna jan salǵan joq. Ásirese atyraýlyq Dosymjan Jumabıdenov «kózdi jabyq kúıde jınaý» kategorııasynda túrli tústi teksheni 60 qatysýshynyń arasynda bir ózi durys oryndap shyqty. Al jarystyń eń kishkentaı qatysýshy Dıas Qaraǵul boldy. Ol qaladaǵy № 34 mektep gımnazııasynda bilim alady. 
