Atyraýlyq munaıshylar dárigerler men polıtseılerge 1 mln teńge jınady
ATYRAÝ. QazAqparat –Atyraýda #Bizbirgemiz aktsııasyna úles qosqan munaıshylar medıtsına men polıtsııa qyzmetkerleri úshin 1 mln teńge jınady, dep habarlaıdy QazAqparat.
«Embimunaıgaz» AQ-da eriktiler qyzmeti jolǵa qoıylǵan. Bul joly kompanııa ujymy karantındegi medıtsına jáne polıtsııa qyzmetkerlerine materıaldyq kómek kórsetýge qoldaý bildirdi. Osy maqsatta kompanııanyń basqarý apparatynyń basshylyq quramy men «Munaıshy qyz» klýbynyń músheleri jeke qarajaty esebinen 1 mıllıon teńgeden astam aqsha jınady. Bul qarajat joǵaryda atalǵan sala qyzmetkerlerine beriledi», - dedi «Embimunaıgaz» AQ basqarma tóraǵasynyń orynbasary, «Munaıshy qyz» áıelder klýbynyń tóraǵasy Rysty Tasmaǵambetova.
Kompanııanyń qoǵammen baılanys qyzmetiniń málimetinshe, buǵan deıin «Embimunaıgaz» AQ tarapynan oblys ákimdiginiń suranysymen Atyraý qalasynyń Bereke yqshamaýdanyndaǵy turǵyn úılerde oqshaýlanǵan azamattardy turmystyq buıymdarmen, azyq-túliktermen, sondaı-aq, kúndelikti tutynýǵa qajetti zattarmen qamtamasyz etýge demeýshilik kómek kórsetilgen. Sońǵy bes jylda kompanııadaǵy eriktiler qyzmetiniń bastamasymen qazaqstandyq 21 kópbalaly otbasy turǵyn úımen qamtylǵan. Al, byltyr kompanııa ujymy respýblıkalyq «Arys. Biz birgemiz!» aktsııasyna qatysyp, Arys qalasyndaǵy az qamtylǵan kópbalaly otbasylarynyń 400-den astam oqýshysyna mektepke qajetti quraldar men kıim-keshekter alyp bergen. Mundaı kómekti Atyraý qalasy men aýdandardaǵy áleýmettik az qamtylǵan otbasylardyń 70 balasy alǵan.
