Atyraýlyq MMA sheberi úsh dúrkin Qazaqstan chempıony atandy
ATYRAÝ. QazAqparat - Almaty qalasynda MMA-dan tuńǵysh ret birikken Qazaqstan chempıonaty ótti. Oǵan elimizdiń barlyq óńirlerinen 250-ge jýyq sportshy qatysty, dep habarlaıdy QazAqparat.
Oblystyq sport basqarmasynyń baspasóz hatshysy Іlııas Shaıhıevtiń aıtýynsha, qańtar aıynda Atyraý oblysynyń irikteý chempıonaty ótip, úzdik atanǵan sportshylar el chempıonatyna attanǵan bolatyn. Nátıjesinde Atyraý oblysynyń sportshylary 1 altyn, 2 kúmis jáne 3 qola medaldi enshiledi.
61,2 keli salmaq dárejesinde álem chempıonatynyń kúmis júldegeri Oljas Moldaǵalıev qarsylas shaq keltirmeı, chempıon atandy.
52,2 keli salmaq dárejesinde jastar arasyndaǵy álem chempıony Erulan Qabdýlov kúmis júldeger atandy. Ol aqtyq synda byltyrǵy eresekter arasyndaǵy álem chempıonymen jolyqqan bolatyn. Taǵy bir kúmis júldeni 56,7 keli salmaq dárejesinde Ádilhan Aıazbaev enshiledi.
Aıta ketelik, Berdibek Sırajov (52,2 kg), Shyńǵyshan Qamalov (65,8 kg) jáne Dýman Balmuhanov (83,9 kg) el chempıonatynyń qola júldegerleri atandy.
