Atyraýlyq qyzdyń óliminen keıin ustalǵan er adamdy qamaýǵa alý sanktsııalandy
ATYRAÝ. QazAqparat - Atyraý oblysynda 8 jasar qyzdyń ólimi boıynsha kúdikti retinde ustalǵan 28 jastaǵy er adamǵa balany zorlady degen aıyp taǵylýy múmkin, dep habarlaıdy QazAqparat tilshisi.
«№2 Atyraý qalalyq sotynyń tergeý sýdıasy kúdiktige qatysty qamaýda ustaý túrindegi bultartpaý sharasyn sanktsııalady. 28 jastaǵy er adam eki aıǵa qamaýǵa alyndy. 1989 jyly týǵan azamatqa QR QK-niń 99-baby, 2-bóligi 10,14-tarmaqtarynda («Zorlaý nemese kórineý kámelettik jasqa tolmaǵan tulǵaǵa zorlyq-zombylyq áreketterimen para-par qylmysty jasyrý nemese onyń jasalǵandyǵyn jeńildetý maqsatynda, ózge adamdy qasaqana óltirý») kórsetilgen qylmysty jasady degen kúdik keltirilýde», - dep málim etti oblystyq ІІD-dan.
Buǵan deıin habarlanǵandaı, súńgýirler Bısekti aýylynda joǵalyp ketken 8 jasar Aıkórkem Aldamjardyń denesin Jaıyq ózeninen tapty. Qyz balany izdep-tabýǵa ishki ister organdarynyń 50 qyzmetkeri men Atyraý qalasynyń 40-tan astam turǵyny jumyldy. Sondaı-aq ІІD, TJD jáne Batys óńirlik aeromobıldi shuǵyl-qutqarý jasaǵynyń qaıyqtarynan bólek, izdeý jumystaryna ózderiniń sýda júzý quraldarymen qala turǵyndary da atsalysty. 5 súńgýir jumys istedi.
Bısekti aýyly turǵyndarynyń aıtýynsha, ustalǵan adam qaza bolǵan qyzdyń otbasynyń kórshisi bolyp tabylady. Úılengen, eki kishkentaı balalary bar.
