Atyraýlyq qutqarýshylar eki saǵatta 3 órtti sóndirdi
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 11 qańtarda 2 saǵattyń ishinde 3 órt oqıǵasy týraly shaqyrtý túsken.
Órt týraly alǵashqy derek jergilikti ýaqytpen 10:37-de tirkelgen. Atyraý qalasynyń Sh.Erkinov kóshesinde ornalasqan meıramhanalardyń biriniń aýlasyndaǵy dúńgirshekten tútin shyqqan. Munda jalpy aýdany 60 sharshy metr bolatyn nan pisiretin dúńgirshek órtengen. Jalyn saǵat 11:17-de tolyq sóndirilgen.
Ekinshi órt saǵat 10:59-da habarlanǵan. Shahardyń Qurmanǵazy kóshesindegi avtokólik jýý ortalyǵy janǵan. Órttiń saldarynan kólik jýý ortalyǵy ǵımaratynyń bir bóligi men 1 avtokólik órtenip ketken. Ortalqytaǵy órt 11:49 saǵatta joıylǵan.
Al, saǵat 11:56-da Juldyz shaǵyn aýdanyndaǵy turǵyn úıdiń biri órtengen. Turǵyn úıdiń jylytý qazandyǵy ornalasqan bólmesinen shyqqan dúmpýdiń saldarynan jalyn tutanǵan. Jalyn turǵyn úıdiń tóbe jabyndysyn sharpyǵan. Órt kezinde úı turǵyndary –5 eresek, 2 bala óz kúshimen qaýipsiz jerge shyqqan. Turǵyn úıdegi órt saǵat 13:07-de tolyq aýyzdyqtalǵan.
«Órt saldarynan zardap shekkender men qaza bolǵandar joq. Qazir órttiń shyǵý sebepteri anyqtalyp jatyr. Úsh jerde tirkelgen jalyndy sóndirýge Atyraý oblystyq tótenshe jaǵdaılar departamentinen 38 qyzmetker men 10 tehnıka jumyldyryldy», -dep habarlady departamenttiń qoǵammen baılanys tobynan.
Eske sala ketelik, Otbasynda janjal shyǵarǵan atyraýlyq úıin órtep, qashyp ketkenin jazǵan bolatynbyz.