Atyraýlyq qutqarýshylar Batys Qazaqstan oblysyna kómekke attandy
Oblystyq tótenshe jaǵdaılar departamentiniń qoǵammen baılanys tobynan málim etkendeı, atyraýlyq qutqarýshylar Aqsaı qalasy men Qaratóbe aýdanyndaǵy tasqyn sýdyń zardabyn joıýǵa kirisken.
«Atyraý oblystyq tótenshe jaǵdaılar departamentinen kórshiles Batys Qazaqstan oblysyndaǵy tótenshe jaǵdaıdyń zardabyn joıýǵa atsalysý úshin 49 qyzmetker, 9 arnaıy tehnıka, 3 úrmeli qaıyq pen 7 motopompa jiberildi. Keshe, 14 naýryzdan beri oblystyq órt sóndirý jáne avarııalyq-qutqarý qyzmeti bastyǵynyń orynbasary, azamattyq qorǵaý maıory Tilekqabyl Dosmaǵanbetovtiń basshylyǵymen atyraýlyq qutqarýshylar Batys Qazaqstan oblysyndaǵy Aqsaı qalasynyń kóshelerinen PNS-110 avtokóligimen sý sorý jumystaryn júrgizip jatyr», -dep habarlady departamenttiń qoǵammen baılanys tobynan.
Sondaı-aq, atyraýlyq qutqarýshylar Batys Qazaqstan oblysynyń Qaratóbe aýdanynda turǵyndardy úrmeli qaıyqpen evakýatsııalaý jumysyn bastaǵan.
Tasqynyn sý aǵynyn bógeý úshin qum toltyrylǵan qapshyqtar tóseýdi de qolǵa alǵan.
Eske sala ketelik, budan buryn Atyraý oblysynda jol jyrylyp, kólik qatynasy toqtaǵan edi.
Jol ýchaskesi jyrylǵannan keıin tasqyn sý deńgeıi tómendegenin jazǵan bolatynbyz.
Sondaı-aq, Qyzylqoǵa aýdanynda sý basýy múmkin aýyldarǵa áýeden barlaý júrgizildi.
Qyzylqoǵa aýdanyndaǵy Mııaly jáne Jangeldın aýyldarynyń kóshelerinen 36 myń tekshe metr erigen qar sýy sorylǵan.
Al, Saǵyz aýylynyń ortasymen ótetin Noǵaıty ózeniniń jaǵalaýy men eldi mekenderdi tasqyn sý qaýpinen qorǵaý úshin qum salynǵan 7 myń qap, 800 tonna topyraq tóselgen.
