Atyraýlyq qutqarýshylar batpaqqa batqan kólikten 4 adamdy evakýatsııalady
Oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, oqıǵa búgin, 4 qańtarda bolǵan.
«Departamenttiń dıspetcherlik pýltine jergilikti ýaqytpen túngi saǵat 02:05-te «ÝAZ» kóliginiń batpaqqa batyp qalǵany týraly aqparat tústi. Atyraý qalasynyń mańyndaǵy Tasqala aýylynan shamamen 40 shaqyrym qashyqtyqta qalyp qoıǵan kólikte 4 adam bolǵan. Shaqyrtý ornyna jedel jetken qutqarýshylar «ÝAZ» avtokóliginiń ózdiginen batpaqtan shyǵa almaıtynyn anyqtady. Qutqarýshylar 4 adamdy jol talǵamaıtyn «TREKOL» kóligimen Atyraý qalasyna jetkizdi», -dep habarlady departamenttiń qoǵammen baılanys tobynan.
Avarııalyq-qutqarý jumystary kezinde eshkim zardap shekpegen. Al, batpaqqa batqan kólikten evakýatsııalanǵan 4 adam medıtsınalyq kómekti qajet etpegen. Qutqarý jumystaryna Atyraý oblystyq tótenshe jaǵdaılar departamentiniń 4 qyzmetkeri men jol talǵamaıtyn 1 «TREKOL» tehnıkasy tartyldy.
Eske sala ketelik, buǵan deıin Atyraý oblysynda iz-túzsiz joǵalǵan er adam 1 qańtardan beri tabylmaı jatqanyn jazǵan edik.
Qurmanǵazy aýdanyndaǵy Kóptoǵaı selolyq okrýginiń turǵyny úıinen shyǵyp ketip, qaıta oralmaǵan. Sodan beri 1972 jylǵy er adamnan esh habar joq. Onyń qaıda ketkenin de, qaıda barýy múmkin ekenin de eshkim bilmeıdi.
Reseı Federatsııasymen shekaradaǵy aýyldan iz-túzsiz joǵalyp ketken turǵyndy izdestirýge 9 adam men 2 tehnıka tartylǵan. Onyń ishinde tótenshe jaǵdaılar bóliminen 7, aýdandyq polıtsııa bóliminiń 2 qyzmetkeri bar. Sondaı-aq, izdestirý jumystaryna jergilikti atqarýshy organ men aýyl turǵyndary da kómek kórsetip jatyr.
Foto: Atyraý oblystyq TJD