Atyraýlyq kıkboksshylar Italııadan jeńispen oraldy
Italııanyń Djesollo qalasynda jastar men jasóspirimder arasynda kıkboksıngten álem chempıonaty ótti. Dúbirli dodaǵa álemniń 60-tan astam memleketinen kil myqty sportshylar qatysty. Kıkboksıng sportynyń óte qarqyndy damyp jatqanyn jarys deńgeıinen baıqaýǵa bolady. Qazaqstan ulttyq quramasy sapynda atyraýlyq 5 sportshy jarysqa qatysyp, onyń 3-eýi jeńis tuǵyrynan kórindi.
Aıta ketelik, dúbirli dodada Serikjan Sálimgereev, Aıan Janbolatov jáne Islamsanjar Tóleýǵalı qola medalǵa qol jetkizip, álemdik synda elimizdiń jalaýyn jelbiretti.
«Jarysqa qatysýshylar sany kóp jáne olardyń daıyndyǵy da jaqsy boldy. Bul - jas sportshylarymyzdyń álemdik arenadaǵy alǵashqy iri jeńisi. Munymen toqtap qalmaımyz, alda birneshe Halyqaralyq týrnırler bar», - deıdi oblystaǵy aǵa jattyqtyrýshysy Danııar ıÝsýpov. 