Atyraýlyq kelinshek gıdroponıka ádisimen mal azyǵyn daıyndaýdy qolǵa aldy
Jylyoı aýdandyq aýyl sharýashylyǵy bóliminiń basshysy Nurtas Qýatbaevtyń deregine súıensek, byltyr Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasymen 100 kásipker qaıtarymsyz grant alǵan.
Sonyń biri – Nurgúl Dáýletova. Qaıtarymsyz granttyń 580 myń teńgeden astam qarjysymen jeke isin bastaǵan.
«Gıdroponıka ádisimen mal azyǵyn daıyndaýdyń qyr-syryn kúıeýim Bımaǵanbet Jumaqashevpen birge onlaın kýrsta oqý arqyly úırendim. Qazir kókónisterdi, malǵa arnalǵan shópti topyraqsyz, qorektik zattardyń sýdaǵy eritindisi arqyly ósiremin. Bastapqyda gıdroponıka ádisimen azdaǵan jylqymyz úshin mal azyǵyn daıyndadyq. Keıin isimiz alǵa basyp, ósirgen mal azyǵynyń artyǵyn satylymǵa shyǵardyq», - deıdi kásipker.
Onyń aıtýynsha, qazir atalmysh ádispen ósirilgen kók balaýsaǵa suranys artyp keledi. Asyl tuqymdy eshki men sıyr ustaıtyn turǵyndardan suranys jıi túsedi.
«Kópshilik bul ádisti bile bermeıtin sekildi. Onymen mal azyǵyn daıyndaý ońaı ári qyzyq. Bazardan satyp alynǵan bıdaı nemese arpanyń dánin aldymen jýyp, tazalaımyz. Sodan soń arnaıy ydystarǵa salyp, úsh mezgil sý quıamyz. Ydysqa salynǵan dándi daqyl bir aptada kók balaýsa shópke aınalady. Osylaı ósirilgen kók balaýsanyń bıikti 20 sm-ge deıin jetedi», -deıdi N.Dáýletova.
Eske sala ketelik, buǵan deıin Atyraý dalasynda qulpynaı ósirile bastaǵanyn jazǵan bolatynbyz.
