Atyraýlyq kelinshek 6-shy balasyn ınfektsııalyq statsıonarda bosandy
ATYRAÝ QazAqparat – Atyraýlyq kelinshek altynshy balasyn ınfektsııalyq statsıonarda bosandy, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetinen málim etkendeı, 5 balaly ana Nurgúl Ońǵarbaeva «vırýstyq pnevmonııa» dıagnozymen ınfektsııalyq statsıonarǵa júktiliktiń 35-aptasynda túsken.
«Alǵashqyda álsireý, qatty qaltyraý baıqaldy. Keıin mobıldi topty úıge shaqyryp, koronavırýstyq ınfektsııaǵa PTR synamasyn tapsyrdym. Úsh kún úıde ambýlatorlyq em aldym. Tórtinshi kúni temperatýra 38 gradýsqa deıin kóterilgen soń jedel járdem shaqyrýǵa týra keldi» - deıdi Nurgúl Ońǵarbaeva.
№2 oblystyq aýrýhanadaǵy ınfektsııalyq statsıonardyń bosandyrý zalynda Nurgúl Ońǵarbaevanyń altynshy sábıin ómire ákeldi. Dárigerler anasy men sábıin aman saqtap qalý úshin kesir tiligi arqyly ota jasaǵan.
«Buryn men, ózge turǵyndar sekildi aýrýdyń bar ekenine senbedim. Bastapqyda ottegi tútigin kıgim kelmep edi. Biraq, jansaqtaý bólimine túskende amalsyzdan kıesiń. Munda táýlik boıy kezekshilik etip, adamdardyń ómirine arasha bolyp júrgen dárigerlerdi, medbıkelerdi kórip, bastapqy oıymnan aınyp qaldym. Meıirimdi dárigerlerdiń qurmetine qyzymyzdyń esimin Meıirim atadyq», - deıdi Nurgúl Ońǵarbaeva.
Baspasóz qyzmetiniń málimetinshe, ınfektsııalyq statsıonarda 51 sábı ómirge kelgen. Qazir statsıonarda 8 áıel emdelýde. Al, 43 jas ana sábıimen birge úıine shyǵarylǵan. Sábılerdiń eshqaısysynan koronavırýstyq ınfektsııa anyqtalmaǵan.
