Atyraýlyq kásipker Ibragım Aqdrashev Baıan Esentaevamen baılanysyn joqqa shyǵardy
ASTANA. QazAqparat - Jýyrda ǵalamtorda Baıan Esentaeva men onyń burynǵy kúıeýi arasynda bolǵan janjal prodıýserdiń tanymal atyraýlyq kásipker, NSS ("NefteStroıServıs") kompanııalar tobynyń qojaıyny Ibragım Aqdrashevpen qarym-qatynasy bolýynan oryn aldy degen aqparat paıda boldy.
«Aq Jaıyq» gazetiniń jazýynsha, mundaı aqparatty áleýmettik jelidegi óz paraqshasynda Rınat Bektasuly degen paıdalanýshy taratqan. Keıin bul málimet aqparattyq portaldar men respýblıkalyq gazetterdiń saıttarynda jarııalana bastady. Alaıda sál keıinirek R.Bektasuly óz paraqshasyndaǵy bul postyny joıyp tastady.
Ibragım Aqdrashev bolsa, bul áńgimeniń shyndyqqa janaspaıtynyn aıtty. «Bul jarııalanymdardyń barlyǵy - múldem ótirik, men Baıan Esentaevamen tanys emespin. Tipti ómirimde ony betpe-bet kórgen de emespin. Men bul las qaýesetterge mán bermes edim, alaıda Esentaevanyń ómirinde sumdyq otbasylyq tragedııanyń oryn alǵany belgili. Qazaqstandyqtar sekildi, men de tek aıaýshylyq pen shynaıy tilektestik bildire alamyn. Men týraly jalǵan aqparattyń taralýyna keler bolsaq: bul birinshi ret oryn alyp otyrǵan joq. Aıtpaqshy, jala japqany úshin birneshe jyl boıyna mundaı ispen áldeneshe ret aınalysqan eki adamǵa qatysty qylmystyq is qozǵaldy. Jáne sońǵy shyqqan jalǵan jarııalanymǵa qatysty máselemen de bizdiń zańgerlerimiz aınalysýda», - dedi ol.
