Atyraýlyq kásipker 500 marafonshynyń jarnasyn tólep berdi
ATYRAÝ. QazAqparat - Atyraýlyq kásipker «Atyrau Marathon-2018» 10 shaqyrymyna júgiretinderge 500 oryn satyp aldy, dep habarlaıdy QazAqparat tilshisi uıymdastyrý komıtetine silteme jasap.
«Atyrau Marathon-2018» aıasynda bıyl 42 shaqyrymdyq negizgi qashyqtyqtan bólek áýesqoılarǵa arnalǵan 10, 4, 5 shaqyrymǵa júgirý uıymdastyrylady.
«Bıyl marafonǵa qatysý aqyly, 42 km qashyqtyqqa jarna - 3 myń teńge, 10 km - 1 myń teńge. Al 4,5 km qashyqtyqqa qatysý tegin. Stýdentter men zeınetkerlerge de qatysý tegin», - deıdi uıymdastyrý komıtetiniń vıtse-prezıdenti ıÝrıı Ponomarev.
Kásipker Erlan Tabyldıev jeńil atletıkany nasıhattaý maqsatynda 10 shaqyrymǵa júgirýshiler úshin 500 oryndy satyp alǵan, ol jarys bastalar kezde sórede qatysamyn deýshilerge taratylady.
«Qalamyzda marafonǵa qatysqysy keletinder qatary kóp, júgirmeýge syltaý tabatyndarda bar. Osy qadamym arqyly 10 shaqyrymǵa júgirýge qatysatyndardy yntalandyrǵym keldi», - deıdi kásipker.
10 shaqyrymdyq júgirý bastalatyn sórede tirkeý orny bolady, qatysýǵa nıettiler sol jerge kelip, tegin tirkele alady. 10 myń metr qashyqtyqtyń sóresi Ábilqaıyr han dańǵylynda, Ýorleı Parsons alańy men Muz saraıynyń arasynda. Qatysýshylardyń jınalý ýaqyty - 8.00-9.15. Qatysýshylarǵa qolaıly bolý úshin saǵat 8.00-de Isataı-Mahambet alańynda avtobýs uıymdastyrylady.
42 195 m qashyqtyqqa júgirýdiń sóresi Muz aıdynynyń aldynda. Qatysýshylardyń jınalýy saǵat 6.00-da. Jarys 7.00-de bastalady. Qatysýshylarǵa qolaıly bolý úshin saǵat 6.00-de Isataı-Mahambet alańynda avtobýs uıymdastyrylady.
4 500 m qashyqtyqqa júgirý sóresi Sátbaev kóshesinde ornalasady, Isataı-Mahambet alańyna qarsy bette. Qatysýshylardyń jınalý ýaqyty 7.30-da, jarys 9.00-de bastalady.
