Atyraýlyq karateshi Ábilmansur Batyrǵalı Azııa chempıony atandy
ATYRAÝ. QazAqparat - Búgin Atyraý halyqaralyq áýejaıynda Azııa chempıony atanǵan karateshi Ábilmansur Batyrǵalıdi jaqyn týystary, dostary saltanatty túrde qarsy aldy, dep habarlaıdy QazAqparat tilshisi.
«Qaısar» sport klýbynyń tárbıelenýshisi japondyq Okınava aralynda karate-dodan eresekter men jasóspirimder arasynda ótken Azııa chempıonatyna qatysty. Baıraqty básekede túrli memleketterden 700-ge jýyq sportshy baq synady. Jarysta álem jáne Azııa chempıonatynyń júldegerleri de baq synady.
17 jastaǵy atyraýlyq Ábilmansur Batyrǵalı 68 kg deıingi salmaq dárejesinde jáne «ıýnıorlar» jas sanatynda synǵa tústi. Sportshy 4 kezdesý ótkizip, Shrı-Lanka, Ózbekstan, Taıland jáne Irandyq qarsylastarynan basyp túsip, Azııa chempıony atandy.
«Eń qıyn kezdesý fınalda ırandyq sportshymen boldy. Barlyǵyna belgili, Iranda barlyq jekpe-jek túrleri jaqsy damyǵan, qarsylasym óte jaqsy daıyndalǵan, sondyqtan bizdiń sońǵy sátke deıin upaıymyz birdeı boldy. Biraq, maǵan jeńis buıyrdy», - deıdi Ábilmansur Batyrǵalı.
Jattyqtyrýshy Sansyzbaı Torǵaevtyń aıtýynsha, doda jasóspirimderge budan da joǵary deńgeıdegi jarystarǵa joldama berdi.
«Aldaǵy ýaqytta Ábilmansur Bolgarııada ótetin jastar arasyndaǵy halyqaralyq deńgeıdegi jarysqa qatysady. Onda jeńgen sportshy Argentınadaǵy Býenos-Aıres qalasyndaǵy jastar Olımpıadasyna joldama alady»,- deıdi Sansyzbaı Torǵaev.
Aıta keteıik, 17 jastaǵy Ábilmansur Batyrǵalı ótken jyly Astanada ótken Azııa chempıonatynyń kúmis júldegeri atanǵan bolatyn, sol jyly karate-dodan Álem kýboginiń ıegeri boldy, sport sheberine úmitker.
