Atyraýlyq ǵashyqtar basynan ótkenderin aıtyp berdi
ASTANA. QazAqparat - Aýyr naýqasqa shaldyǵyp, birneshe jyl aýrýhanadan shyqpaǵan qulsarylyq Ánel Muratova men onyń súıiktisi, dosy Marlen Nurgasenovtyń tańǵajaıyp mahabbat hıkaıasy kópshilikti jylatyp ta, qýantyp ta úlgerdi, dep jazady Aqjaıyq gazeti.
«Ekeýmiz bir mektepte Qulsary qalasynda oqydyq, Marlen menen bir synyp tómen oqydy, - dep bastady áńgimesin Ánel - Dostyǵymyz 16 jastan bastaldy. Resmı túrde usynys jasaý sııaqty nárseler bolǵan joq, bári aıaq astynan boldy. Basynda telefonmen, ınternet arqyly sóılesip júrdik. Keıin ol 9-synypty bitirip, Aqtóbege kolledjge oqýǵa túsedi, al men mektepte oqyp júrdim. Sol kezde men qatty aýyrdym...
«Men Qaraǵandyǵa operatsııaǵa ketip bara jatqanymda bir kún buryn oǵan telefonmen jaǵdaıymdy aıttym. Ol nege ekeni belgisiz, qashan, qaı poıyzben shyǵatynymdy surastyryp aldy. Men mingen poıyz Aqtóbege soqpaıdy, Qandyaǵashqa toqtaıdy. Al, Marlen sabaqtan qashyp shyǵyp, Aqtóbeden Qandyaǵashqa kelip, meniń vagonyma otyryp alady. Ony kórip men qýanyp, «sabaǵyń qaıda?» dep surap jatyrmyn ǵoı. «Sen operatsııaǵa ketip bara jatqanda men qalaı sabaqta otyramyn?» demesi bar ma? Árıne, anam da buǵan tańǵaldy. Ol buryn ony kórmegen edi. Keıin «jaqsy bala eken, kez kelgen jigit olaı jasaı bermeıdi, jaraıdy, ishiń pyspaıtyn boldy» dep, birden qoldap ketti. Al Qaraǵandyda Marlen aýrýhanada meniń janymda túnep júrdi. Dárigerler oǵan palataǵa kirýge ruqsat bermese de, ol kirip ketetin. Pysyq jigit qoı, áıteýir bir ebin taýyp keletin. Túngi aýysymdaǵy medbıkelerge tátti torttar ákelip, olardyń da kóńilderin kóterip qoıatyn. Eń bastysy, únemi qasymnan qalmaıtyn. Meni moraldyq turǵyda qoldaıtyn. Men dál osylaı bolatynyna senbeıtinmin. Múmkin sol kezde biz ekeýmiz bul mahabbat ekenin túsingen bolarmyz», - deıdi Ánel.
Qos ǵashyq nekelerin 2015 jyly Qaraǵandyda qıdyrǵan.
«Men aýrýhanada únemi Áneldiń janynda bolýym úshin syrttaı oqý bólimine aýystym. Keıin dárigerler «bul balany kóndire almaısyń báribir» dep, qoldaryn bir siltedi. Onda dárigerler kileń orys. Men orysshaǵa shorqaqpyn, sonda da barymdy aıtyp, tilderin tabýǵa tyrystym. Keıin bárimen dos bolyp kettik, keterde qımaı qoshtastyq qoı, - deıdi Marlen.
«Meniń ókpemdi alyp tastady. Biraq, kórgen qıyndyǵym munymen bitpedi. Kúnine 25 túrli dári-dármek qabyldaǵandyqtan asqazan-ishek joldarynyń jumysy buzyla bastady. Sol Qaraǵandyda dárigerler ota jasaý kerek dep, 8 santımetr ishegimdi kesti. Al 2012 jyly júregim syr bere bastady. Tek bir ókpe jumys jasap turǵasyn, júrekke ottegi jetpedi. Kez kelgen ýaqytta aýa jetpeı qalýy múmkin bolǵasyn ottegi ballonyn aldyrttyq. Osy kezde Marlen Qaraǵandyda jumys tapqan bolatyn. Ol meniń jaǵdaıymdy estı sala, «men jumystan shyǵam, seniń qasyńda bolyp, ballondy kóterip júremin» dedi. Men ottegi ballonynsyz júre almaıtyn boldym. Kez kelgen ýaqytta esimnen tanyp qalatynmyn. Ne istep, ne qoıyp jatqanymdy bilmeı qalamyn. Sol kezde Marlen toqtamaı sóılep, «mine, biz osynda otyrmyz, myna jerdemiz» dep esimdi jınatqyzatyn»,- deıdi Ánel.
Qaraǵandadyda ókpesine ota jasaǵan dáriger «Jedel ota jasaý kerek, júrekti qalaı da ornyna ákelý kerek» ekenin eskertedi. Áıtpese, kez kelgen ýaqytta ómirine qaýip tónip turǵan bolatyn.
Marlen men Ánel Astana, Almatynyń dárigerlerine barady. Sol kezde Almatyǵa Máskeýden kelgen professor Áneldi tekserýden ótkizedi de, Marlenge «sen qyzdy ári-beri súıreme, boldy, ómir súrýge 30 paıyz múmkindigi bar, eshkim oǵan ota jasaý jaýapkershiligin almaıdy, bosqa súırep, álsiretpeı, áke-sheshesine apar, daıyndala bersin» deıdi.
«Birde túnde uıqymnan oıansam, Marlen Qudaıdan duǵa tilep otyr eken. Allany kórip turǵandaı sóılesedi eken. «Synap jatqanyńdy bilemin, biraq qatty synamashy, Áneldiń aýyrǵanyna shydaı almaımyn, jol kórsetshi» dep qudaıǵa jalbarynatyn. Ony estip men jylap, Marlenniń meniń ómirim úshin kúresip júrgenin kórip, «men nege ózimniń ómirim úshin kúrespeımin» dep, ál jınap, óz-ózime senimdi bola bastadym», - dep eske alady.
«Ólip qaıtyp tirilsem de Ánel meniń ómirimniń máni. Iá, qıyn boldy. Biraq, týystarymyz, dostarymyz barynsha kómektesti, aqsha jiberip turatyn. Qaraǵandyda júrgende ózim de dalada túnegen kezderim de boldy. Eshteńege ókinbeımin, sebebi Ánelim janymda. Negizi men osy jyly ınternette biz týraly jazǵanda tańǵaldym. Adamdar maǵan hat jaza bastady...», - deıdi Marlen.
