Atyraýlyq ǵalymdar ózen saǵasynan balyq aýlaýdy shekteýdi usyndy
Atyraý oblysynyń ákimi Nurlan Noǵaev Qurmanǵazy aýdanyna barǵan jumys saparynda aımaqtaǵy balyq sharýashylyǵy problemalaryna arnalǵan kóshpeli jınalys ótkizdi. Oǵan memlekettik organdar men quqyq qorǵaý salasynyń ókilderi, óndiristik kooperatıvterdiń basshylary qatysty. Jınalystyń negizgi taqyryby balyq sharýashylyǵyn retteý, zańsyz balyq aýlaýshylarmen kúres tóńireginde órbidi.
Balyq qoryn saqtaý maqsatynda Qazaq Ulttyq balyq sharýashylyǵy ınstıtýtynyń ókilderi sý aıdynynyń, teńizdiń eki jaǵynan da saǵasynan 50 shaqyrym aýmaqta jáne úsh metrden tómen tereńdikten kásipshilik balyq aýlaýdy shekteýdi usyndy. «Amangeldi» ÓK basshysy Sanat Tilepbergenovtiń aıtýynsha, qazirgi qoldanystaǵy júıemen balyq aýlaýdy jalǵastyra berse, endi biraz ýaqyttan keıin aımaqtaǵy balyq qory azaıyp ketedi.
«Bizdiń kooperatıv ótken jyldan beri teńizden kásipshilik balyq aýlap jatyr. Úsh metrden asatyn tereńdik jaǵadan alys emes. Árıne ol úshin jabdyqtalǵan flot, kemeler kerek, esesine nátıjesi de jaqsy bolady. Tórt balyqshymyz 132 tonna balyq aýlady. Teńizde balyq bar, - dedi Sanat Tilepbergenov.
Aıta keteıik, sońǵy bes jylda kásipshilik balyq aýlaýǵa beriletin lımıt eki esege azaıyp, 25 myń tonnadan 12,5 myń tonnaǵa deıin tústi. Solaı bola tura, osy jyldar aralyǵynda belgilengen lımıt birde bir ret tolyǵymen ıgerilgen joq.
«Biz lımıtti jaıdan-jaı azaıtqanymyz joq, balyq aýlaıtyn kooperatıvter ıgere almaıdy, balyqty brakonerlerden qabyldap júr. Bul máseleni sheshý úshin salaǵa zańdy tártip engizý kerek. Zańsyz balyq aýlaýshylardy toqtatyp, adal balyqshylar úshin jaǵdaı jasaýǵa tıispiz», - dedi Nurlan Noǵaev.
Aımaq basshysy barlyq usynystardy qarap, mamandar men balyqshylardyń óńirde balyq qoryn saqtaý jónindegi pikirlerin esepke alýdy tapsyrdy.
Ótken jyly atalǵan saladaǵy óndirilgen ónim kólemi 9,8 tonna boldy. Balyq ónimderin eksporttaý kórsetkishi 240 tonnaǵa artyp, 8 374 tonnaǵa jetti.
Oblystyq aýyl sharýashylyǵy jáne veterınarııa basqarmasynyń basshysy Erbolat Qadımov 2017 jyly Reseıge 6,2 myń tonna balyq eksporttalǵanyn aıtty, al 1 895 tonna balyq jaqyn shetelderge, Ýkraına, Ózbekstan men Grýzııaǵa jiberilgen. 187 tonna Germanııa, Polsha, Frantsııa sekildi basqa da Eýropa elderine eksporttalǵan.
