Atyraýlyq Esenbek Sıǵýatov grepplıngten tuńǵysh álem chempıony atandy
ATYRAÝ. QazAqparat - Jerlesimiz qatysqan Álem chempıonaty 6-10 qyrkúıek aralyǵynda Astana qalasynda ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Astanada grepplıng kúresinen ótken jasóspirimder arasyndaǵy Álem chempıonatynan qos sportshymyz jeńispen oraldy.
46 keli salmaq dárejesinde Esenbek Sıǵýatov álem chempıony atandy. 11-synyp oqýshysy alǵashqy kezdesýinde reseılik qarsylasyn tize búktirdi. Jartylaı fınalda qazaqstandyq otandasymen jolyqsa, fınalda vengrııalyq sportshyny utyp, jasóspirimder arasynda Atyraýdan shyqqan tuńǵysh álem chempıony atandy.
Sondaı-aq, 50 keli salmaqta 13 jasar Arsen Rızýanov kúmis júldege ıe boldy. Іrikteý kezeńinen sátti ótip, jartylaı fınalda Frantsýz balýanyn utty. Tek, aqtyq básekede reseılik qarsylasyna ese jiberip aldy. Eresekter arasyndaǵy saıysta Tynys Bısalıev qola júldege ıe boldy.
