Atyraýlyq eki oqýshy halyqaralyq olımpıadanyń júldesi úshin qarjylaı syıaqy aldy
Oqý-aǵartý mınıstri Ashat Aımaǵambetovtiń aıtýynsha, bıyl qazaqstandyq oqýshylar halyqaralyq pándik olımpıadalar 3 altyn, 15 kúmis, 9 qola medal alǵan. Olarǵa jalpy somasy 76 mln teńgeden asatyn qarjylaı syıaqy berilgen.
«Memleket basshysy Qasym-Jomart Toqaev daryndy balalardy qoldaýǵa erekshe kóńil bólip otyr. Bıyl Prezıdent halyqaralyq pándik olımpıadalardyń jeńimpazdaryna birjolǵy aqshalaı syıaqy tóleý erejesin qarastyratyn zańǵa qol qoıdy. Osylaısha oqýshylarymyz halyqaralyq zııatkerlik saıystarda jeńiske jetkeni úshin alǵash ret aqshalaı syılyqqa ıe boldy. Altyn medal alǵan oqýshylar 1 500 AEK, kúmis medal úshin 1 000 AEK, qola medal ıegerleri 500 AEK kóleminde aqshalaı syılyq aldy. Oqýshylardy olımpıadaǵa daıyndaǵan ustazdarǵa da bir rettik syıaqy berildi, -deıdi Ashat Aımaǵambetov.
Halyqaralyq pándik olımpıadadan júldeger atanǵan oqýshylar arasynda Atyraý oblysynan eki oqýshy bar. Atap aıtqanda, «Bilim-Innovatsııa» lıtseı-ınternatynyń túlekteri, fızıkadan halyqaralyq olımpıadanyń (IrhO) kúmis medal ıegeri Rızabek Alpamys 3 mln 180 myń teńge, matematıkadan halyqaralyq olımpıadanyń (IMO) qola medal ıegeri Zaýythan Ádilet 1 mln 590 myń teńge ıe boldy. Al, olardyń ustazdary Ádilet Raısov, Mevlıýt Aıaz, Arnur Qazybekovke jáne ata-analaryna mınıstrdiń alǵys haty tabystaldy.
Eske sala ketelik, buǵan deıin UBT-da 132 ball jınaǵan atyraýlyq túlek Ońtústik Koreıa ýnıversıtetine oqýǵa túskenin habarlaǵan bolatynbyz.
