Atyraýlyq depýtat oqýshylarǵa kovorkıng ortalyǵyn ashyp berdi
ATYRAÝ. QazAqparat - Atyraý qalasynda alǵash ret mektep janynan balalar kovorkıng ortalyǵy ashyldy, dep habarlaıdy QazAqparat tilshisi.
«Nur Otan» partııasy Atyraý oblystyq fılıalynyń qoldaýymen №2 J.Nájimedenov atyndaǵy orta mektep janynan boı kótergen ortalyq zamanaýı úlgide jabdyqtalǵan. Munda balalardyń bos ýaqyttaryn tıimdi ótkizýlerine barlyq jaǵdaılar qarastyrylǵan. Aldaǵy ýaqytta bul jerde balalar men ata-analarǵa arnalǵan túrli trenıngter men ıntellektýaldyq saıystar men sabaqtar uıymdastyrý josparlanyp otyr.
Balalar ortalyǵynyń ashylýyna óńirge belgili metsenat, Atyraý qalalyq máslıhatynyń depýtaty Álibek Semǵalıev demeýshilik etti.
«Mektep, kitapxanalar janynan balalar kovorkıng ortalyqtaryn ashý qazirgi zaman talaby. Bul demalys aımaqtary balalardyń oı-órisin, shyǵarmashylyǵyn damytýǵa baǵyttalǵan. Eń bastysy - ortalyqta túrli tanymdyq sharalar men erkin formattaǵy basqosýlar ótkizýler arqyly balalardyń ózara qarym-qatynastaryn nyǵaıtýǵa jaǵdaılar jasalǵan. Aıta ketý kerek bul ázirge Atyraý qalasyndaǵy mektep janynan ashylǵan alǵashqy ortalyq, aldaǵy ýaqytta «nurotandyqtardyń» qoldaýymen olardyń sany artady dep kútilýde», - deıdi Álibek Semǵalıev.
«Mektep janynan kovorkıng ortalyǵy boı kótergenine ata-analar da dán rıza. Bilim oshaǵynda balalardyń bos ýaqyttaryn tıimdi ótkizetin orynnyń ashylýyn «nurotandyqtardyń» bolashaq urpaqqa degen qamqorlyǵy dep túsinemin», - deıdi Raıgúl Álimjanova.
Aıta ketelik, óńirde budan basqa «Qazaqstan kitaphanalary - Bilim ortalyqtary» partııalyq joba aıasynda 10 kitaphana janynan kovorkıng ortalyqtary ashylǵan.
